Është biseduar këtu për Luginën e Diellit, por është edhe një pjesë, për të mos thënë dy-trefishi i ndërtimeve që janë duke u ndërtuar ndërtesa të larta, banesa që tipi më i vogël i tyre 12 familje strehon e shkon edhe deri në mbi 20. E të tilla janë afërsisht rreth njëqind. Ato banesa janë të ndërtuara, një pjesë nga to, në pronën publike, ndërsa pjesa tjetër është e ndërtuar në pronat private të blera nga shqiptarët dhe pakicat joserbe nga shteti serb, përmes Kishës Ortodokse. Pyetja është: Dinë organet ligj-zbatuese, por edhe ministria të cilën e drejton ministri Xhelal Sveçla, cilët janë banorët e vendosur në ato banesa që bëjnë një numër jo të paktë. Tjetra: Ka të dhëna se cila është toka, sa është e pronës private dhe sa është në pronë publike? Pyetja tjetër është: Ndërtimet janë duke u bërë nga disa kompani të dyshimta, që ekskluzivisht janë shqiptare. Ka të dhëna ministria për to? Kush janë ato kompani? 

Në komunën e Gjilanit ka kohë që është duke u ndërtuar Shkolla e Mesme e Muzikës. Edhe pse me shumë vonesë, kjo shkollë ende nuk është funksionalizuar. E njëjta duke u ndërtuar ka filluar edhe të dëmtohet. Gjithashtu, nga të reshurat e shiut brenda objektit pikon uji, për të cilën gjë kemi ngritur këtë shqetësim edhe në Komunën e Gjilanit. E nderuara ministre Nagavci, pyetja ime konkrete është: A do të jetë i gatshëm objekti i Shkollës së Mesme të Muzikës për muajin shtator, ashtu që nxënësit të kenë mundësi ta fillojnë vitin e ri shkollor në objektin e ri? Faleminderit! 

. Çështja ka të bëjë, se plot ambasada tona kanë ngelur pa ambasadorë dhe me vrullin që janë shkarkuar ambasadorët, unë kam menduar që shumë shpejt do të zëvendësohen, sepse situata në të cilën gjendet Kosova me procesin e dialogut dhe mosprania e ambasadorëve nëpër vendet mike, mendoj që e dëmton shtetin e Kosovës. Çfarë po ndodh? Pse në komision ende, duke ditur procedurat e emërimit të ambasadorëve, në Komisionin për Punë të Jashtme nuk kemi ende asnjë emër që duhet të intervistohet nga komisioni për t’u bërë ambasador dhe kur do të ndodhë kjo, sepse u bënë muaj që kjo çështje po zvarritet dhe duke e ditur si shkojnë procedurat, derisa vijnë në komisionin parlamentar, intervistohen, kthehen prapa dhe mënyra se si duhet të akreditohen edhe në vendet pritëse, unë mendoj që është një periudhë e gjatë dhe po mendoj që me këtë ritëm që e keni filluar edhe nja 6- 7 muaj s’do të kemi ambasadorë. 

Pas Marrëveshjes së Uashingtonit, një prej pikave ka qenë edhe mosaplikimi për anëtarësim në organizata ndërkombëtare, gjë që nga ju është kundërshtuar ashpër, se me këtë punë po i bëhet dëm Kosovës. Për anëtarësim në organizata ndërkombëtare nevojitet një përgatitje, në mënyrë që të mos dështojmë. Pyetja: Sa është përgatitur Qeveria e Kosovës për aplikim në organizata ndërkombëtare dhe cilat do të jenë ato organizata që do të aplikojnë? 

I gjithë aktiviteti politik i Lëvizjes Vetëvendosje që prej themelimit dhe juve si udhëheqës i saj ka qenë i bazuar në nevojën që për masa reciproke në mes Republikës së Kosovës dhe Serbisë. Madje, ai ishte zotimi juaj më i përsëritur edhe para zgjedhjeve të fundit parlamentare. Saktësisht, me paraqitjen e juaj të fundit publike gjatë fushatës zgjedhore, pikërisht më 12 shkurt, dy ditë para mbajtjes së zgjedhjeve, ju u zotuat se reciprociteti do të jetë një nga vendimet e para të Qeverisë suaj. Taksativisht deklaruat se “reciprociteti do të jetë çështje ditësh, ose javësh, kurrsesi muajsh. Nuk e di cili do të jetë sekuenca, por është ndër gjërat e para që do të bëjmë”. Pyetje: Zoti Kurti, për dijeninë tuaj, kanë kaluar ditë, javë e muaj, më saktësisht jemi në muajin e pestë të qeverisjes suaj dhe nuk keni ndërmarrë asgjë për masa reciproke. Përkundrazi e, për fat të keq, tanimë po shohim edhe heqjen e taksës si masë anti-dopingu ndaj blloqeve të ndërtimit, që vijnë nga Serbia. Çka është kah ndodh, zoti kryeministër? A mund të na tregosh, kah je nisur kështu? Faleminderit!

I nderuar ministër, Rruga nga Prishtina për Podujevë është ndër rrugët më të ngarkuara në vend. Mijëra vetura e bëjnë këtë rrugë çdo ditë dhe ky numër rritet gjatë sezonës së verës, kur bashkatdhetarët tanë kalojnë nga pika kufitare në Merdar. Zgjerimi i rrugës ka nisur para më shumë se gjashtë vjtetësh, por punimet janë zhvilluar ngadalë e pa mbështetje të nevojshme financiare. Përveç që punimet po zvarriten nga viti në vit, segmentet e para që kinse kanë përfunduar kanë probleme shumë serioze. Fshatra të caktuara nuk kanë mundësi të kyçjes në rrugë dhe kjo po u shkakton vetëm probleme në qarkullim. Problem serioz kanë edhe autobusët, për shkak se nuk ka vend, por stacione dhe shoferët detyrohen të ndalen në rrugë për të zbritur udhëtarët, duke e rrezikuar kështu direkt jetën e tyre. Rruga nuk ka shirit ndihmës, mungon sinjalizimi, mungon ndriçimi, mungojnë vendkalimet. Rruga është shndërruar në një katrahurë të vërtetë, sidomos për qytetarët që udhëtojnë për punë çdo ditë në këtë rrugë, sepse ballafaqohen me stresin dhe vonesat që u shkaktohen nga punimet që nuk u përfunduan kurrë. Gjithashtu, atyre u shkaktohen edhe shumë shpenzime nga dëmet që po u bëhen automjeteve që qarkullojnë në këtë rrugë. Këtë rrugë e keni obligim ta përfundoni edhe për mijëra bashkatdhetarë tanë nga mërgata, të cilët e bëjnë këtë rrugë për të ardhur në Kosovë dhe në vend të një shisheje ujë për ta, që ka bërë bashkpartiaku juaj, apo kryetari i Podujevës, është mirë t’i siguroni kushtet për rrugën e tyre. Apo, është kjo mirëseardhja që ua bëni? Nuk duhet që mërgatën ta shikojmë vetëm si votë. Pyetja ime, ministër, është: Cilat janë veprimet që do të ndërmerrni në këtë drejtim, që punimet në rrugën Podujevë - Prishtinë të përfundojnë sa më parë? Faleminderit! 

Çka do të bëni ju për shpronësimet dhe për sa kohë planifikoni që kjo rrugë të përfundojë në tërësi, sepse me dinamikën që po zhvillohen punimet kjo rrugë do të zgjasë edhe dhjetë vjet dhe nuk do të ndërtohet. Faleminderit! 

Banorët e Podujevës ballafaqohen çdo ditë me mungesë të ujit të pijes. Ujin po e sigurojnë nga burime natyrore, puse që i hapin vetë, ose duke e blerë atë. Madje, në shumë pjesë të Podujevës banorët janë detyruar edhe të bartin ujë prej largësisë. Shumë fshatra nuk e kanë fare rrjetin e ujësjellësit, e në shumë të tjera nuk kemi ujësjellës funksional dhe arsyet nuk i dimë. Rreth 30% e fshatrave dhe lagjeve furnizohen me ujë nga puset apo sistemet e vogla lokale, të cilat nuk menaxhohen nga ujësjellësi, përfshirë këtu edhe një numër të madh i institucioneve arsimore. Javët e fundit temperaturat e larta e kanë rritur mungesën e ujit dhe ky paraqet problem shumë të madh për të gjithë llapjanët, sidomos për banorët e qytetit, të cilët nuk mund të bëjnë zgjidhje alternative. Ata detyrohen të bartin ujë, thuajse jetojnë në Mesjetë. Pyetja ime, zoti ministër, është: Cilat janë veprimet konkrete që do të ndërmerrni për të siguruar qëndrueshmëri në furnizim me ujë për banorët e Podujevës. A keni plan konkret në këtë drejtim që në bashkëpunim me Komunën e Podujevës, Ministrinë e Ekonomisë dhe Ujësjellësin të gjeni një zgjidhje sa më shpejt? Faleminderit!

Kjo është forma e raportimit më 15 korrik, i nderuar ministër, kjo më 16, dallojnë shumë dhe ka një mospërputhje të madhe. Pastaj me raportimet me datën 17. Pra, ka një ndryshim jashtëzakonisht të madh, një mospërputhje totale në raportimet e Ministrisë së Shëndetësisë. A mund të na tregoni çka po ndodh me këto raportime? Si mund të ndodhë të prezantohen vaksinimet ditore 12 mijë, ndërsa dozën e parë të shtohen për 128 mijë pra brenda 24 orëve. Ku është problemi? A s’po mund të dini ta mbani evidencën, apo po tentoni rrejshëm t’i prezantoni shifrat? Çka ka ndodhur, sepse ka mospërputhje shumë të madhe në raportimet në faqen zyrtare të Ministrisë së Shëndetësisë. Nuk mund të mblidhen doza e parë dhe e dytë e të prezantohet njëjtë. Nuk ka gjasa që kjo të ndodhë njëherë mirë nga Ministria e Shëndetësisë.

Përkitazi me procesin e vaksinimit, më vjen mirë që tashmë nuk po diskutohet as këtu në seancë, askund në asnjë forum tjetër për numrin e vaksinave. E dimë tashmë një vendim të Ministrisë që më 15 qershor ka filluar vaksinimi në masë. Po të analizojmë shifrat që u diskutuan këtu, nga fundi i javës së kaluar kemi pasur një rritje të madhe të numrit të vaksinimit. Përkitazi me këtë, tashmë siç kemi marrë informacion, dimë që çdo qendër e vaksinimit është e furnizuar dhe ka ekipet përkatëse në secilën komunë të Republikës së Kosovës. Mirëpo, kemi edhe raportime të tilla që kemi ngecje në disa qendra të vaksinimit dhe kemi ngecje në disa komuna. Pyetja ime konkrete drejtuar ministrit Vitia është: A kemi ndonjë komunë dhe ju si Ministri e Shëndetësisë a keni evidentuar që kemi ngecje në këtë proces të vaksinimit dhe nëse ka diçka të tillë si Ministri e Shëndetësisë a keni evidentuar arsyet pse ka ngecje në komuna, respektivisht në qendra të caktuara të vaksinimit? Ju faleminderit!

Më 12 maj të këtij viti nën kryesimin tuaj është mbajtur mbledhja e parë e nivelit të lartë e komitetit ndërministror për koordinimin e procesit për zgjedhjen e projektit dhe monitorimin e procesit të implementimit të projektit për kompleksin memorial “Adem Jashari” në Prekaz. Ashtu siç e meriton, ju keni shfaqur përkushtimin që kompleksi memorial “Adem Jashari” në Prekaz ta trajtoni me seriozitetin më të lartë, në mënyrë profesionale, transparente dhe me integritet të lartë kombëtar. Pyetja ime është: Duke u nisur nga fakti që e bëma e familjes Jashari është historike dhe vetëmohimi i saj është gurthemel historik i lirisë dhe imazh i shtetndërtimit tonë, a mund të na informoni se në çfarë faze të realizimit është projekti për kompleksin memorial “Adem Jashari” në Prekaz?

Pyetja ime ka të bëjë me një shqetësim të vazhdueshëm të organizatave që përkujdesen për të drejtat e grave dhe barazinë gjinore, që shkala e punësimit të grave në Kosovë është jashtëzakonisht e ulët krahasuar me burrat. Kjo gjendje është përkeqësuar akoma më shumë edhe si pasojë e pandemisë COVID-19, ku si pasojë e mbylljes së bizneseve shumë gra kanë humbur vendet e tyre të punës. Duke e marrë parasysh rëndësinë e mirëqenies së grave për një shoqëri të shëndoshë, statusi ekonomik dhe punësimi i tyre është çështje themelore për shoqërinë tonë. I nderuar ministër Murati, A mund të na tregoni, ju lutem, sa është buxheti i ndarë për krijimin e vendeve të reja të punës për gratë dhe rikthimin në punë të grave që kanë humbur punën si pasojë e pandemisë? Cili është procesi i ndarjes së buxhetit dhe çfarë incentivash do të përdoren për të rritur punësimin e grave? Faleminderit!