Vazhdimisht kemi dëgjuar për ankesa dhe parregullsi nga ana e bujqve lidhur me mënyrën se si janë shpërndarë grandet nga ana e Ministrisë së Bujqësisë. I nderuar ministër, kjo është pyetje e shumë qytetarëve të interesuar, se cili do të jetë modaliteti i shpërndarjes së grandeve nën drejtimin e Ministrisë nga ana e juaj? 

Faleminderit, kryetar! Kabinet qeveritar, Të nderuar kolegë deputetë, Të dashur qytetarë, Komuna e Mitrovicës ka nisur një betejë me trashëgiminë kulturore. Në planin zhvillimor komunal potencohet qartazi tek infrastruktura publike ndërtimi i muzeut të qytetit përballë Shtëpisë së Armatës, duke lënë hapësirë për dyshimet se çfarë do të ndodhë me Shtëpinë e Armatës, sidomos kur lexohet fusha e prioriteteve strategjike për krijimin dhe zhvillimin e hapësirave për zhvillimin e aktiviteteve kulturore. Muzeu i qytetit planifikon të ndërtohet përballë Shtëpisë së Armatës, që nënkupton përtej rrugës ‘Shemsi Ahmeti’, e cila ndanë pronat tërësisht dhe largazi. Komuna nuk e ka bërë të qartë qëndrimin e saj në lidhje me objektin në fjalë. Shtëpia e Armatës, kjo ndërtesë duhet të ruhet e të shërbejë si rrëfim për torturat dhe ndjekjet, që shqiptarët i kanë përjetuar në kohën kur është ndërtuar ky objekt nga shteti jugosllav. Pra, i shërben memories kolektive. I nderuar ministër, Duke kuptuar ndarjen e kompetencave gjithsesi, por të shqetësuar për këtë dukuri, pyetja është se a do të ndërmerret diçka nga ana e ministrisë suaj për ruajtjen e këtij objekti. Faleminderit!

Faleminderit, kryetar! E nderuar ministre, Në kuadër të buxhetit të shtetit për vitin 2022, është edhe ndërtimi i shkollës në fshatin Ponoshec në Komunën e Gjakovës. Për këtë projekt edhe Komuna e Gjakovës ka ndarë një shumë në vlerë prej 150 mijë euro nga buxheti i saj. Megjithatë, punimet në terren ende nuk kanë filluar edhe përkundër faktit që mjetet financiare ekzistojnë. E nderuar ministre, A mund të na informoni se çfarë veprime konkrete po ndërmerr Ministria e Arsimit, Shkencës dhe Teknologjisë në realizimin e këtij projekti dhe kur pritet që fillojnë punimet?

Cilat janë masat që do të merren nga ana e Ministrisë së Arsimit për të luftuar  konfliktin e interesit? 

Javën që shkoi kemi parë lansimin e projektit “Kosova, shtet i xhudos”. Sa fuqizon ky projekt përkrahjen institucionale në këtë sport dhe në cilat aspekte konkretisht? 

Sigurisht se jeni të informuar me probleme të shumta që kanë banorët e veriut të Kosovës. Një nga këto probleme është edhe transporti për banorët, duke pasur parasysh distancën, sidomos të fshatrave Koshtovë, Bistricë dhe Cerajë. A planifikon të kthehet transporti humanitar, apo të ofrohet ndonjë zgjidhje tjetër për këtë problem, për këta banorë?

A mund të na e shpjegoni infrastrukturën ligjore dhe mundësitë që i ka ministria juaj për ta ruajtur këtë objektin e shtëpisë së Islam Shipolit? 

A mund të na njoftoni se çfarë hapa po merren nga institucionet tona për edukimin dhe ruajtjen e fëmijëve tanë gjatë përdorimit të internetit?

Në disa pjesë të fshatrave të komunës së Istogut, siç janë Shushicë e Ulët e Tomoc, ka probleme të theksuara me rrjetin telefonik të operatorit Vala.

A ka plan nga operatori Vala për rregullimin e këtij problemi dhe në ç’ periudhë kohore mund të evitohet ky problem?

A mund të na njoftoni më shumë për marrëveshjet, si dhe për përfitimet që do të kenë bibliotekat komunale? 

Pyetja ime për ju sot është se, në çfarë faze aktualisht është projekti i ndërtimit të impiantit për trajtimin e ujërave të zeza në qytetin e Mitrovicës

Pyetja është kjo: a ka ndonjë plan konkret ministria për ndërtimin dhe funksionalizimin e ujësjellësit në zonën e Shalës së Bajgorës dhe nëse po, kur pritet të fillojë implementimi i atij plani?

 A është kontraktuar kompania mbikëqyrëse pasi që kanë kaluar disa muaj nga shkëputja e kontratës dhe akoma nuk kemi një informim për këtë çështje, dhe sa do të zgjasë procedura e kontraktimit të kompanisë punëkryerëse të projektit të rrugës Prishtinë-Mitrovicë?

A mund ta dimë se ku janë ngecjet që kanë quar në ndaljen e realizimin e projektit të shtratit të Lumit Sitnica dhe cilat janë hapat që Ministria po planifikon t’i ndërmarrë për rifillimin e punimeve?