Pyetja ka të bëjë me hartën zonale të Kosovës. Në gusht të vitit 2013 është miratuar Ligji nr. 04/L-174 për planifikim hapësinor, ku parashihet hartimi i hartës zonale të Kosovës, si dhe hartave zonale komunale. Më pastaj, në udhëzimin administrativ nr. 06/2016 për pjesët dhe kërkesat themelore për hartimin, zbatimin dhe monitorimin e planit hapësinor të Kosovës, sipas të cilit janë përcaktuar edhe afatet kohore për hartimin e këtyre dokumenteve. Meqenëse nuk janë respektuar këto afate kohore dhe kanë kaluar vite të tëra dhe ende nuk i kemi dokumentet përkatëse që janë aq të rëndësishme për zhvillim të qëndrueshëm dhe të baraspeshuar të planifikimit hapësinor për të territorin e Kosovës, pyetja është qëndron këtu: I nderuar ministër, A jeni në dijeni se pse nuk janë respektuar ende këto afate kohore dhe a është duke u miratuar apo hartuar harta zonale e Kosovës, e cila është aq e rëndësishme për zhvillim të qëndrueshëm?

I nderuar Kabinet qeveritar, Kolegë deputetë, Të dashur qytetarë, Pyetja ime ka të bëjë me adresimin e një çështjeje që ka të bëjë me rrugën magjistrale Gjakovë Prizren. I nderuar ministër Aliu, Duke e parë nevojën për zgjerimin e këtij aski rrugor që lidhë dy qytetet, Gjakovën dhe Prizrenin, për shkak të fluksit të madh të kësaj rruge, dëshirojmë të dimë se cilat janë planifikimet e Ministrisë së Mjedisit, Planifikimit Hapësinor dhe Infrastrukturës për këtë rrugë, dhe se a do të jetë ndër projektet e vitit të ardhshëm në kuadër të Buxhetit të Qeverisë së Republikës së Kosovës. Ju faleminderit!