Çështja ka të bëjë me mungesën e trajtimit të diferencuar për personelin e sektorit të sigurisë në Projektligjin për sigurimin e detyrueshëm të kujdesit shëndetësor. Në një kontekst të mjedisit të ndjeshëm të sigurisë dhe rritjes së kërcënimeve hibride, roli i institucioneve të sigurisë mbetet thelbësor për funksionimin dhe mbrojtjen e shtetit. Megjithatë, Projektligji për sigurimin e detyrueshëm shëndetësor trajton në mënyrë të njëjtë të gjithë qytetarët dhe nuk parasheh një regjim të veçantë për kategori me rrezik të shtuar profesional, si shembull që është FSK-ja, Policia, AKI-ja, zjarrfikësit e kështu me radhë. Në praktikat e konsoliduara të shteteve demokratike, këto kategori trajtohen përmes skemave të diferencuara, të bazuara në rrezik, që përfshijnë mbulim të zgjeruar shëndetësor, rehabilitim, trajtim të traumave operative dhe sigurim jetësor. Mungesa e një qasjeje të tillë krijon boshllëk në këtë rast në mbrojtjen ligjore të këtyre kategorive dhe ndikon drejtpërdrejt me gatishmërinë operacionale dhe sigurinë kombëtare. Prandaj, pyetja ime është: Duke pasur parasysh se Projektligji për sigurimin e detyrueshëm shëndetësor trajton në mënyrë të njëjtë të gjithë qytetarët, pa paraparë një regjim të veçantë për kategoritë që përballen me rrezik të lartë profesional, siç i përmenda FSK-në, Policinë, AKI-në zjarrfikësit në mes tjerash, dhe duke marrë parasysh se këto kategori, jo vetëm që operojnë në kushte të rrezikut të shtuar, por edhe e përfaqësojnë shtetin në operacione dhe misione të ndjeshme, shpesh në partneritet me aleatët tanë strategjikë, pse Qeveria nuk ka paraparë në këtë projektligj një regjim të veçantë dhe të garantuar me ligj për sigurimin shëndetësor dhe jetësor të personelit të sigurisë dhe a po kërkohet nga Kuvendi që të miratojë një skemë që nuk adreson në mënyrë adekuate rrezikun real të këtyre kategorive?

Çështja tjetër ka të bëjë me delegimin e elementeve thelbësore të sigurimit shëndetësor në akte nënligjore, në kundërshtim me rolin primar ligjvënës të Kuvendit. Duke pasur parasysh se në sistemet demokratike, sipas parimeve të shtetit të së drejtës, elementet thelbësore të të drejtave dhe detyrimeve të qytetarëve përcaktohen në ligj dhe nuk delegohen në tërësi tek ekzekutivi, ndërsa projektligji aktual në disa dispozita kyçe i delegon këto elemente në akte nënligjore, a mund të na sqaroni, ju lutem konkretisht: si justifikohet që elementi më thelbësor i këtij ligji, çfarë mbulohet konkretisht për qytetarët në këmbim të 3,5% që ju kërkohet, në këtë rast është shtatë totali, natyrisht 7%. Nuk përcaktohet në ligj, por delegohet në akte nënligjore. Sipas nenit 16 paragrafi 1, Ministria e Shëndetësisë harton akt nënligjor për shërbimet shëndetësore që mbulon fondi. Po ashtu, sipas nenit 16 paragrafi 3, edhe procedurat dhe detajet për trajtim jashtë vendit përcaktohen gjithashtu me akte nënligjore. Pra, ligji nuk e përcakton vetë çfarë konkretisht mbulohet, por ia delegon komplet këtë Qeverisë. A nuk përbën kjo një delegim të vetë thelbit të së drejtës së sigurimit shëndetësor? A i është kërkuar Kuvendit të Republikës së Kosovës që të miratojë vetëm një kornizë formale ligjore, ndërsa elementet thelbësore, të drejtat dhe detyrimet reale të qytetarëve të përcaktohen më vonë nga Qeveria përmes akteve nënligjore? Faleminderit! 

E kam një nënpyetje. Nëse paketa e përfitimeve, neni 16, lista e barnave neni 17, edhe rregulla financiare: procedurat e zbatimit, nenet 20 dhe 21; të gjitha përcaktohen me akte nënligjore nga Qeveria. Çfarë saktësisht po voton Kuvendi? 38 A është një ligj me përmbajtje reale apo vetëm një autorizim që Qeveria ta shkruajë ligjin më vonë? Për shkak se, zotëri ministër, në dokumentet që na keni dërguar nuk ka projeksione të detajuara financiare, nuk ka kosto reale të sistemit e as të ardhura të llogaritura, edhe nuk ka skenar rreziku, ka vetëm një opinion dhe kjo nuk është analizë financiare. Prandaj, pyetja ime është shumë e thjeshtë: Si mund Kuvendi të votojë një sistem sigurimi shëndetësor kur askush nuk na ka treguar sa kushton, si mbahet në këmbë dhe të gjitha detyrimet në fakt për Qeverinë, për Republikën e Kosovës si institucion, delegohen te Qeveria dhe për të cilat.