Çështja ka të bëjë me mungesën e investimit në autostradën “Ibrahim Rugova”, pra në segmentin e autostradës Ibrahim Rugova, konkretisht në pjesën ndërmjet Prizrenit dhe Suharekës si dhe Malishevës e Drenasit. Tash në një kohë të gjatë është evidentuar një rrëshqitje e vazhdueshme e dheut, e cila ka rezultuar në kufizimin e qarkullimit në vetëm një shirit. Kjo situatë ka shkaktuar vështirësi të konsiderueshme për qytetarët dhe pjesëmarrësit në trafik, duke rrezikuar edhe aksidente. Për më tepër, janë raportuar dhe raste aksidentesh me pasoja fatale në këtë segment, çka e bën edhe më urgjent nevojën për ndërhyrje institucionale. Në këtë kontekst, kërkojmë nga Ministria e Infrastrukturës që të japë përgjigje në pyetje në vazhdim. Pse nuk është ndërmarrë ende një ndërhyrje e plotë dhe e qëndrueshme për sanimin e rrëshqitjes së dheut në këtë segment të autostradës? A ekziston një plan konkret për rehabilitimin e kësaj pjese dhe kur priten të fillojnë punimet, si dhe a është bërë ndonjë vlerësim teknik për shkaqet e kësaj rrëshqitjeje të vazhdueshme, e cila tash është për një kohë të gjatë problem adekuat në këtë autostradë?