Faleminderit, i nderuar kryetar i Kuvendit! I nderuar Kabinet qeveritar, Zëvendëskryeministre, Ministra, Të nderuar kolegë deputetë, Të dashur qytetarë të Republikës së Kosovës, ju në Kosovë dhe në diasporë, Mirë se u kthyem bashkë në Sesionin vjeshtor të Kuvendit të Republikës! Fillimisht, më lejoni që gjithashtu në emrin tim personal dhe të Grupit Parlamentar të Lëvizjes Vetëvendosje t’u shprehim ngushëllimet më të sinqerta të gjithë familjeve që humbën të dashurit e tyre nga infektimi me virus SARS COV-2, që nga dita kur ne përmbyllëm punimet e sesionit pranveror. Ishte një periudhë e rënduar me numra të lartë si rrjedhojë e prezencës së virusit të modifikuar DELTA dhe gjithë gëzimi e angazhimi i familjeve në ahengjet familjare, fatkeqësisht për një numër të konsiderueshëm të qytetarëve tanë doli të jetë me pasoja për jetën e tyre. Pas një periudhe njëmujore nga 12 gushti, kur e mbajtëm seancën e fundit të sesionit pranveror, në deklarime jashtë rendit të ditës apeluam për vaksinim të të gjitha grupeve të qytetarëve, të 4 cilët plotësojnë kriterin e moshës për vaksinim, numri i të infektuara me variantin e ri DELTA është rritur dramatikisht. Një fakt për t’u përmendur është se shumica e viktimave, apo mbi 90% nuk ishin të vaksinuar. Sot kur kemi arritur të kemi mbi 1 milion qytetarë të vaksinuar dhe mbi 35% të qytetarëve të moshës madhore të vaksinuar me dy dozat, duhet ta kemi të qartë se normalizimi nuk mund të arrihet nëse nuk e kalojmë 60% të vaksinuar me të dy dozat e vaksinës. Andaj, e domosdoshme dhe e paalternativë për tejkalimin e krizës mbetet vaksinimi dhe vetëm vaksinimi. Të dashur qytetarë, Të gjithë do të mund të bënim më shumë dhe më mirë për të parandaluar atë me çfarë u ballafaquam javët dhe muajt e shkuar. Më e madhe sfida, më i madh duhet të jetë mobilizimi ynë për të tejkaluar vështirësitë, me të cilat po ballafaqohemi. Përveç sfidës së madhe të pandemisë, e cila zgjedhjen kryesore e ka vaksinimin, janë sfidat e tjera të mirëqenies që plotësohen me vendimet dhe mekanizmat për shtet të barabartë dhe social. Krijimi i mekanizmave të shtetit me mirëqenie sociale, të filluara nga Qeveria Kurti, po e forcon bazën për një shoqëri të shëndoshë dhe një të ardhme të mirë për gjeneratat e reja. Vendimi i Qeverisë për shtesat për nënat lehona të papuna, në vlerë prej 170 euro për gjashtë muaj, dhe ato të punësuara, në vlerë të njëjtë për 3 muaj, është vendimi i cili jo vetëm që ndihmon familjet e reja, por edhe siguron që parametrat demografikë të mos kalojnë në negative, sipas trendit aktual që e kishim. Për dikë që mund të ketë dyshuar në këtë masë, interesimi i nënave dhe familjeve për shtesat është i madh. Vetëm në javën e parë, pas njoftimit dhe fillimit të aplikimit prej të hënës deri të premten, aplikimet janë 13 180, prej tyre 1 505 mbështetje për gra lehona dhe 11 679 shtesa për fëmijë. Qeveria e Republikës së Kosovës sapo u bëri thirrja vajzave dhe grave profesioniste për aplikimet në bordet udhëheqëse të ndërmarrjeve publike, ndërsa ato vajza dhe gra që studiojnë dhe mendojnë për punësim, nuk janë vetëm. Shumë shpejt do të publikohen masat për vajzat dhe gratë për punësim dhe ndihmë në vetëpunësim. Një kategori, për të cilën duhet pasur vëmendje të veçantë në këta muajt e fundit janë bujqit dhe fermerët, që u pa se ishin dëmtuar nga abuzimi sistematik që u bë me grante ndër vite në Ministrinë e Bujqësisë, porse tani duhet gjetur të gjitha format e duhura që përveçse të vendoset rregull dhe verifikim për përfituesit e granteve, gjithashtu të rriten subvencionet për bujqësi. Masat e reja për një shoqëri me mirëqenie për të gjitha kategoritë do të vazhdojnë, por nuk duhet të harrojmë se për t’u kthyer në një normalitet të plotë të gjithë duhet të vazhdojnë të vaksinohen. Siç ishte e paraparë, që nga 15 qershori kur ishim në një situatë më të qetë pandemike, zgjedhjet e rregullta lokale do të mbahen ende kur rreziku nga pandemia nuk ka kaluar. Andaj, edhe 5 kujdesi duhet të jetë i shtuar dhe me shumë përgjegjësi nga të gjithë të përfshirët në procesin zgjedhor. Një proces demokratik nuk duhet ta rrezikojë shëndetin publik, andaj ju bëj thirrje të gjitha subjekteve politike, kandidatëve për kryetarë komunash dhe asamble komunale, deputetëve dhe të gjithë pjesëmarrësve në procesin zgjedhor respektoni masat, vaksinohuni, mbani distancën, takohuni në ambiente të hapura, ende kemi ditë me mot të mirë. Ruani veten dhe të tjerët dhe shpëtoni jetë! Gjithashtu, uroj që ky Parlament në sesionin vjeshtor të mos bëhet arenë e ndeshjeve dhe promovimeve për zgjedhjet lokale. Pushtetet janë të ndara, jemi legjislativ. Ju uroj punë të mbarë të gjithëve dhe uroj të punojmë në dobi të qytetarëve të Republikës! Faleminderit!

Të nderuar qytetarë, Kryetar i Kuvendit, Kolegë deputetë, Kabinet i Qeverisë, Zonja dhe zotërinj, Meqenëse është seanca e parë e sesionit vjeshtor të Kuvendit, që në fillim dëshiroj t’ ju uroj të gjithëve punë të mbarë në agjendën që e kemi para vetes si deputetë! Por, meqë është seanca e parë pas një periudhe pushimi, që ishte periudhë tragjike për jetën e qindra qytetarëve tanë në ballafaqim me pandeminë, për çfarë u shpreh ngushëllime të gjitha familjeve që humbën më të dashurit e tyre, nuk mund të lë pa thënë se për punë të mbara nuk mjaftojnë uratat, as fjalët dhe as dëshirat. Për punë të mbara kërkohet reflektim, angazhim dhe ballafaqim me përgjegjësitë që kemi gjithsecili prej nesh. Reflektim, angazhim e përgjegjësi, pikërisht këto cilësi që nuk i kemi parë t’i ushtrojë kjo Qeveri gjatë kësaj periudhe. Çdo qeveri e përgjegjshme dhe e ndërgjegjshme një ballafaqim të tillë me rrethanat pandemike, në të cilat gjendemi sot, do të duhej ta kishte shtruar në një rrafsh social e kombëtar e kurrsesi politik, në një rrafsh të bashkëpunimit e jo të refuzimit, sepse pasojat tragjike dhe rrethanat e rënduara për qytetarët nga pandemia nuk janë çështje politike, janë çështje publike dhe emergjente. Pushteti mund t’i takojë dikujt në një kohë të caktuar, por publikja na takon të gjithëve në çdo kohë, prandaj edhe kemi përgjegjësi për të e rreth saj. Pikërisht për shkak të kësaj përgjegjësie ndaj gjendjes së rëndë që kishim gjatë dy muajve të fundit, unë iu drejtova me një letër kryeministrit Kurti për t’i ofruar bashkëpunimin tim dhe të Partisë Demokratike të Kosovës, madje duke ftuar dhe partitë e tjera opozitare që të ulemi së bashku e të gjejmë mundësi dhe alternativë për një përgjigje shumë më efikase ndaj rrethanave të rënduara. 6 Megjithëse isha në fillet e drejtimit të Partisë Demokratike të Kosovës, unë nuk doja të ndiqja shembullin që ka vendosur vetë zoti Kurti, duke krijuar ndasi politike për shkak të qëndrimeve partiake dhe për tema të rëndësisë nacionale, sepse një model të tillë e kemi parë dhe e kanë parë të gjithë qytetarët e Kosovës. Një model i tillë prodhon kriza, por nuk zgjidh kurrfarë krize. Prandaj, përballë kësaj nevoje emergjente, unë pashë në drejtim të Kosovës e jo në drejtim të partisë që drejtoj, sepse Kosova është emëruesi i përbashkët i të gjithë neve. Prandaj, kam besuar e besoj se përballë kësaj gjendjeje do të duhej të ishim një front i përbashkët përtej politik. Por, kryeministri Kurti refuzoi një angazhim të tillë të përbashkët, nuk kishte as vëmendje, as përgjigje, as iniciativë. Ndërsa, numri i vdekjeve rritej e bëhej treshifror çdo javë. Përballë këtij refuzimi e mosreflektimi në këto rrethana, gjërave dua t’u vëmë emrat e tyre përkatës. Ishte keqmenaxhimi i Qeverisë shkaku që prodhoi këto pasoja. Ishte keqadministrimi i Qeverisë shkaku që jemi ndër të fundit në Evropë në procesin e vaksinimit, ndërsa hedhim vaksina që u skadon afati pa i administruar. Ishte keqplanifikimi i kësaj Qeverie që ka lënë qindra profesionistë shëndetësorë të paangazhuar e të pambështetur në ditët më të ngarkuara të punës së tyre dhe pa asnjë dyshim, ishte leximi i gabuar i krejt rrethanave paralajmëruese rreth rrezikut të variantit DELTA, pikërisht në kohën kur kjo Qeveri e kishte lëshuar për tokë obligimin për ta menaxhuar rrezikun e përhapjes së këtij varianti, sepse Qeveria i hapi në verë dasmat dhe ahengjet për të na i mbyllur në vjeshtë shkollat dhe çerdhet. Pra, përgjegjësia për këtë gjendje i takon vetëm kësaj Qeverie. Por, edhe pse ne nuk do t’i mbyllim asnjëherë sytë përballë dështimeve që kanë shkaktuar këtë gjendje, nuk do të bëhemi kurrë oportunistë politikë kur është në pyetje shëndeti i qytetarëve. Prandaj, unë besoj që edhe sot duhet një front i përbashkët për t’ua lehtësuar qytetarëve tanë ballafaqimin me pandeminë COVID-19, sepse ndonëse fatmirësisht ka filluar të bjerë numri i rasteve, nuk ka asnjë garanci që gjendja nuk mund të rëndohet përsëri më vonë. Dhe, kur jemi te qytetarët, ata më 17 tetor do të vendosin për qeveritë e tyre lokale. Është e domosdoshme që ata të kenë mundësi të zgjedhin e të përcaktohen mirëfilli për kandidatët, në të cilët besojnë se u përgjigjen nevojave të tyre. Është mirë që fushata t’u lihet kandidatëve, atyre që u takon përgjegjësia e llogaridhënia para qytetarëve të komunave të Republikës së Kosovës. Dhe, është më së mirë që temat e politikës qendrore t’u japin përparësi temave të politikës lokale në katër javët e ardhshme, ashtu që fokusi i këtyre zgjedhjeve vërtet të jenë qytetarët dhe interesat e tyre. Detyrat tona këtu në Kuvend, por sidomos në Qeveri, në radhë të parë duhet të jenë të fokusuara në parandalimin e mëtejmë të përhapjes së dëmit të pandemisë. Faleminderit!

Faleminderit, kryetar i Kuvendit! Shumë të respektuar deputetë të Kuvendit të Republikës së Kosovës, 7 Qytetarë, Kabinet qeveritar, Do të ishte shumë e mirëseardhur që të fillojmë sesionin vjeshtor me punët që na presin dhe me detyrat që i kanë deputetët e këtij legjislativi. Mbi të gjitha, me përgjegjësitë që t’u shërbejmë interesave të qytetarëve të vendit. Por, fatkeqësisht edhe sot pas një vere të zymtë, pas një vere që la shumë pasoja, ne duhet së paku të shprehim ngushëllimet për të gjithë qytetarët tanë që humbën më të dashurit e tyre në betejën me COVID-19, po mbi të gjitha humbën besimin e shpresën nga papërgjegjësia, nga keqmenaxhimi, më mirë të themi, nga mosmenaxhimi fare i tërësishëm dhe nga heqja dorë e menaxhimit me pandeminë COVID-19. Paralajmërimet tona të sinqerta në muajin qershor dhe në fillim të korrikut, Qeveria jo vetëm që i neglizhoi, por filloi edhe duke u tallur, ashtu siç ishte tallur, ashtu siç kishte përdorur pandeminë vitin e kaluar, ashtu siç kishte tentuar edhe të sabotonte punën e institucioneve shëndetësore, po mbi të gjitha edhe të Qeverisë, në kryerjen e detyrave shtetërore për t’i dalë zot shëndetit publik të qytetarëve tanë. Pikërisht më 2 gusht, kur ishte hedhur alarmi në rajon dhe në mbarë botën se varianti DELTA ka përfshirë masë të madhe në shpërndarjen e infeksionit dhe do të jetë i pranishëm në Kosovë, kryeministri Kurti dhe ministri i Shëndetësisë dolën edhe para këtij Kuvendi, ta them me një gjuhë, ndoshta nuk është edhe shumë etike, duke u krekosur se pandemia ka marrë fund dhe qytetarët mund të ndihen të lirë që të jetojnë dhe të veprojnë pa mbikëqyrje të masave, pa kufizime dhe pa kujdes të veçantë në ruajtjen e shëndetit publik. Çka prodhoi kjo? Kjo prodhoi pasoja të tmerrshme. Këto pasoja u evidentuan edhe në masat e papërgjegjshme. Masat më të papërgjegjshme që do të jenë njollë në institucionet tona, edhe shëndetësore, edhe publike, edhe qeveritare, janë masat e 11 dhe 12 gushtit, kur infeksioni u dhjetëfishua e Qeveria prapë vazhdoi me relaksimin e masave. Largoi punëtorët shëndetësorë dhe inspektorët në mbikëqyrjen e masave dhe u fsheh diku, ku vetëm këta e dinë, pa e pasur as vëmendjen më të vogël se çfarë po ndodh me humbjen e jetëve të qytetarëve tanë, me stërngarkimin e kapaciteteve spitalore dhe me çka mund të përballeshin edhe profesionistët shëndetësorë. Qeveria u adresua në një formë tjetër. Filloi kritikën për opozitën, kaloi te qytetarët për shkak të mbipopullimit, ose të dasmave, ose aktiviteteve të tjera dhe në fund akuzoi edhe institucionet profesionale shëndetësore. Në fund të fundit, u detyrua për shkak të presionit që ta pranojë gabimin. Por, a e pranoi përgjegjësinë? Jo. Se, njerëzit e papërgjegjshëm nuk mund ta pranojnë përgjegjësinë. Ministri i Shëndetësisë u tregua shumë i papërgjegjshëm, nuk e pranoi përgjegjësinë, por e pranoi gabimin, e gabimi kushton. Këtë gabim do të duhej ta merrte për bazë edhe vetë kryeministri me shkarkimin e këtij ministri të Shëndetësisë, i cili u tregua skandaloz në rajon dhe në mbarë Evropën, duke e bërë Kosovën vendin më të tmerrshëm në ranglistat 8 botërore, në lista të zeza, duke e shndërruar Kosovën në 40-minutësh të vdekjeve dhe humbjeve të jetës së qytetarëve tanë dhe pa asnjë fije dyshimi u zhduk në javën kryesore më të rëndë, kur kishim humbje të jetës së njerëzve, deri në 36 jetë shumë të vlefshme, që pasojat e tyre i bartin së pari familjet, por edhe shoqëria. Të nderuar kolegë deputetë, Është e vërtetë që kërkesa jonë për frontin e përbashkët në luftimin e pandemisë asnjëherë nuk ka reshtur. Kërkesa jonë që qytetarët tanë të vaksinohen edhe nga ajo papërgjegjësia e hedhjes së vaksinave, asnjëherë nuk ka reshtur, por edhe dora jonë që të shtrijmë bashkëpunimin dhe të ofrojmë atë modesti të vogël në tejkalimin e kësaj situate. Mbi të gjitha, dikush duhet të jetë përgjegjës. I nderuar kryeministër, Duke marrë për bazë se edhe shumë shtete të tjera demokratike kanë kaluar me pasojat, por nuk e kanë anashkaluar papërgjegjësinë, ky ministër është treguar i papërgjegjshëm. Andaj, duhet ta shkarkoni dhe të na kërkoni falje publike neve dhe të gjithë familjarëve që kanë humbur jetën nga masat, nga mosmbikëqyrja e masave dhe nga relaksimi...

Të nderuar deputetë, Të nderuar qytetarë, Pushtetarë, Bashkëndiejmë me ata që kanë humbur të dashurit e vet. Vonë është thirrja në përgjegjësi, ose në reflektim. Ajo që është më kryesorja, të ftohen qytetarët të vaksinohen dhe po ashtu t’i respektojnë masat, ta ruajnë shëndetin e vet, sepse me sa duket, duhet të kujdesen për vete, se Qeveria nuk ka qenë këtu të kujdeset për ta në mënyrën e duhur. Ndërsa sot, po e shfrytëzoj rastin, meqë është kryeministri këtu. Unë, kryeministër, kam pyetur tre ministra tuajt, është e Drejtësisë, është ministri i Transportit dhe ministri i Rendit, për “Babën e tenderëve”, për një kryehajn, që emrin e ka Nexhat Krasniqi, sipas këtyre tre ministrave. Edhe i pyes në çdo seancë, sa herë që mundem, nuk më kanë dhënë përgjigje. Kur kam qenë kryetar Qeverie në pyetjen e parë që ma kanë bërë, ju kam dhënë përgjigje. Kam shkuar, jam interesuar për pyetjen e tyre, i kam respektuar si deputetë, kam shkuar menjëherë, jam interesuar për pyetjen e tyre edhe e kam gjetur kush është personi. Ka rezultuar që ai është larguar prej pune. Tani, nuk e di të vërtetën e këtij njeriu, por po ju pyes juve, a e dini ju për Nexhat Krasniqin që më kanë pyetur tre ministrat tuaj, a është Nexhati ende “kryekriminel”, 9 “Baba i tenderëve”, e ku di unë, apo është i mirë ai, apo ju, kryeministër e tre ministrat tuaj jeni më të këqij se Nexhati. Do t’ ju shkruaj edhe një letër për këtë. Edhe një pyetje tjetër, por këtë e kam për dy shokë të mi, Fatmir Humollin - Bacin dhe Gani Krasniqin. Të dy dua t’i pyes, qysh ka kaluar Liburni në Beograd dhe çka është puna e këtij korridorit të hekurudhave si diçka e re? Faleminderit!

Të nderuar deputetë, I nderuar kryetar i Kuvendit, I nderuar Kabinet qeveritar, Kryeministri i Republikës në dialog duhet të shkojë për njohje dhe ulëse në OKB dhe kurrsesi nuk mund të shkoni për ta redaktuar të vërtetën e historisë sonë si popull dhe si shtet. Për dy dekada me radhë Serbia dhe partnerët e saj nuk kanë reshtur së sulmuari kauzën e luftës sonë për çlirim. E në vend se Qeveria jonë t’u kundërvihet këtyre përpjekjeve, pavetëdijshëm ajo sikur po u kontribuon atyre. Po e them “në mënyrë të pavetëdijshme”, sepse nuk kam as vullnet, as imagjinatë, aq sa për të besuar se po e bën në mënyrë të qëllimshme, ngase fundja Qeveria dhe njerëzit e saj pavarësisht se nuk janë të aftë për të qeverisur, sërish janë bashkëkombësit e saj, qytetarë të këtij vendi, që e dinë të vërtetën dhe e ndajnë historinë së bashku me të gjithë ne. Ndonëse Qeveria jonë është e pavëmendshme dhe e pavetëdijshme, një skenar i tillë dhe një agjendë kundër të vërtetës së luftës sonë është evidente dhe gjithnjë e më shumë aktive. Natyrisht, fjala është për pretendimet rreth arkivave të Ushtrisë Çlirimtare të Kosovës. Rreth kësaj teme s’kam çka flas, sepse kur nuk ka subjekt, nuk ka as trajtim. Por, megjithatë dua të flas për agjendën si të tillë. Të nderuar kolegë, Ju kujtohet deklarata e kryeministrit pas darkës me Borellin, ku tha që Ballkani Perëndimor duhet të çlirohet nga kriminelët e luftës, pra pa pasur guximin që këtu ta apostrofojë Republikën tonë. Pastaj, duke vazhduar me deklarata denigruese të ministres sonë të Jashtme, zonjës Shvarc, në raport me luftën e Ushtrisë Çlirimtare të Kosovës. Dhe, së fundmi, deklaratën skandaloze dhe të papritur të zëvendëskryeministrit Bislimi për arkivat e UÇK-së. Pra, këto të tria përbëjnë një trekëndësh, që s’do të duhej të ekzistonte kurrë nga qeveritarët tanë. Kryeministër, po ta përkujtoj që kriminelë të luftës janë Milosheviqi, Dikoviqi, Papkoviqi, Lazareviqi, Arkani, Marjanoviqi, Lukiqi e shumë e shumë të tjerë, që kanë komanduar, urdhëruar dhe kryer krime, si dhe kanë drejtuar banda vrastare në luftën në Republikën e Kosovës. 10 Pra, ju kryeministër, duhet të kërkoni nga Vuçiqi që të hapen arkivat për mbi 400 masakra të kryera në Kosovë, rreth 14 000 civilë të vrarë, mijëra të zhdukur, të cilët edhe sot na mungojnë rreth 1630 dhe mbi 20 mijë gra të dhunuara. Pra, i nderuar kryeministër, mos ia legjitimoni Serbisë ankesën, se dëshmi për krime të luftës që paska kryer UÇK-ja gjenden në Prishtinë dhe Qeveria e Kosovës është e gatshme t’i hapë ato. Është e papranueshme të negociosh me Serbinë, duke rënë në grackën e saj për tema inekzistente, që fatkeqësisht tashmë ke rënë... Si deputet dhe qytetar, kërkoj nga Qeveria që të mos e devijojë agjendën e dialogut në temat që shpik Serbia dhe armiqtë e saj. Pra, në dialog duhet të kërkohet njohja nga Serbia, anëtarësimi ynë në OKB. Faleminderit!

I nderuar Kabinet qeveritar, Kryeministër, Deputetë, Qytetarë të Kosovës, Siç e do rendi, unë fillimisht u shpreh ngushëllime të gjithë atyre që kanë humbur më të dashurit gjatë pandemisë. Megjithatë, përderisa është detyrë e opozitës t’i poentojë pikat e dobëta dhe të përqendrohet te kritika konstruktive, megjithatë është rendi që kur të kthehemi t’i potencojmë disa gjëra se çka ka ndodhur në tetë muaj që po lëmë pas. Fillimisht Kosova ka disa lajme të mira, sidomos tek aspekti ekonomik dhe ajo që duhet të lumturojë qytetarët e Kosovës është se rritja ekonomike në 8 muajt e fundit vlerësohet të jetë diku në versionin konservativ rreth 7% për disa arsye, sepse është dyfishi çfarë ne kishim planifikuar. Është larg përtej mesatares ballkanike, po gjithashtu edhe larg përtej rritjes ekonomike në Bashkimin Evropian, që vlerësohet të jetë 2%. Aktiviteti biznesor po ashtu është shtuar. Në tetë muajt e fundit kemi regjistruar rreth 9000 biznese të reja. Rreth 1300 më shumë se çdo vit, që nga viti 2012. Kosova po ashtu ka filluar të eksportojë. Në vitin, në tetë muajt që po lëmë pas kemi eksportuar 450 milionë euro, që është dyfishi krahasuar me vitin 2020 apo trefishi krahasuar me vitin 2019. E rëndësishme është që ritmi i rritjes së eksporteve e tejkalon ritmin e rritjes së importeve. Gjithashtu, Shqipëria për herë të parë është bërë partneri i parë tregtar në rajon, si në import, ashtu edhe në eksport. 11 Ajo që duhet theksuar, po ashtu, është që besimi qeveritar është manifestuar edhe me rritje të të hyrave buxhetore. Që nga ardhja e Qeverisë Kurti për çdo muaj janë inkasuar rreth 200 milionë euro në buxhetin e shtetit, që është diku rreth 40 milionë euro më shumë sesa vitin 2019 e rreth 60 milionë euro më shumë sesa vitin 2020. Pra, kjo rritje prej 30% të hyrave buxhetore nuk është vetëm krahasuar me vitin 2020, po është edhe krahasuar me vitin 2019. E fundit që duhet të potencoj është të hyrat, investimet e huaja direkte. Kosova duket se është bërë vend tërheqës edhe për investimet e huaja direkte. Në këta tetë muaj i kemi regjistruar afërsisht 300 milionë euro investime të huaja direkte, që është rreth dyfishi më shumë sesa çdo vit tjetër, që nga viti 2014. E fundit në sesionin vjeshtor të vitit të kaluar, Kosova ka regjistruar 200 mijë punëkërkues aktivë dhe ajo që është e rëndësishme, duhet të theksohet se ky numër ka rënë në 100 mijë, që është një shenjë se po ashtu tregu i punës është stabilizuar me rritën ekonomike. Si përfundim, diaspora ka kontribuar jashtëzakonisht shumë gjatë kësaj kohe, qoftë përmes shpenzimeve gjatë vizitave të tyre, po ashtu... Diaspora ka qenë një kontribuues kryesor i kësaj rritjeje ekonomike. Si përfundim, besimin qytetar nuk e kemi tradhtuar. Gjatë viti 2021 nuk është dyfishuar vetëm Vetëvendosja, por si duket janë dyfishuar edhe parametrat ekonomikë. Faleminderit!

Faleminderit, kryetar! Të nderuar qytetarë të Republikës së Kosovës, Të nderuar deputetë, Të nderuar anëtarë të Kabinetit Qeveritar, I nderuar kryeministër, Unë si deputete e Lidhjes Demokratike në Kuvendin e Republikës së Kosovës jam munduar t’i përcjell me vëmendje zhvillimet politike aktuale brenda dhe jashtë Republikës së Kosovës, të paktën politika që ndërlidhen me Republikën e Kosovës. Ju, zoti kryeministër, në pesëmujorin e fundit keni vizituar disa shtete të rëndësishme, duke përfshirë këtu Republikën e Turqisë, Greqinë dhe Francën. Tani, ju kryeministër i Republikës së Kosovës, për të dytën herë dhe shqetësimet e mia janë rreth marrëdhënieve të Shteteve të Bashkuara të Amerikës me Qeverinë e Republikës së Kosovës. Sipas informatave publike, 12 tashmë e kemi të qartë se për vizitë në Shtetet e Bashkuara të Amerikës kanë udhëtuar presidentja, zonja Osmani dhe ministrja e Punëve të Jashtme, zonja Gërvalla. Unë si deputete e Kuvendit të Republikës së Kosovës shpreh shqetësimet e mia. Dëshiroj ta di për ju si kryeministër i Republikës së Kosovës se a keni aplikuar për vizë për t’i vizituar Shtetet e Bashkuara të Amerikës bashkë me presidenten dhe ministren e Punëve të Jashtme? Nëse po, në cilën datë keni aplikuar dhe çfarë përgjigje keni marrë? Dhe nëse jo, a mund të na tregoni pse deri më tani nuk keni vizituar Shtetet e Bashkuara të Amerikës, kur dihet se në bisedimet që tanimë kanë filluar dhe ju jeni duke i shtjelluar bashkë me Republikën e Serbisë, roli i SHBA-së, qoftë edhe i tërthortë, është i pazëvendësueshëm. Tani, presidentin Biden e kemi mikun më të madh të të gjithë shqiptarëve dhe mikun më të madh të Republikës së Kosovës dhe duke e ditur se promotori kryesor i lëvizjeve politike në botë, në Ballkan dhe në Kosovë gjithsesi janë vetëm Shtetet e Bashkuara të Amerikës dhe nuk është as Turqia, as Greqia, as Franca, ne Lidhja Demokratike kemi qenë, jemi dhe do të jemi gjithmonë për ruajtjen e përhershme të miqësisë me Shtetet e Bashkuara të Amerikës. Po besoj se e keni kuptuar se për çfarë jam duke folur. Zoti kryeministër, Edhe aksioni juaj i sotëm në veriun e Kosovës pa mbështetjen amerikane dhe në kohë fushate të zgjedhjeve lokale është i ngjashëm me atë të ish-kryeministrit Thaçi. Faleminderit!