Zoti kryeministër, sipas njoftimit zyrtar të datës 12.04.2021, në një takim të ngrohtë dhe miqësor keni pritur përfaqësuesin special të Sekretarit të Përgjithshëm të Kombeve të Bashkuara, zotin Zahir Tanin. Sipas njoftimit zyrtar, ai ju ka përgëzuar për fitoren dhe ka theksuar se prioritete të tij janë ato që reflektojnë kërkesat e qytetarëve. Gjithmonë, sipas njoftimit zyrtar, sipas këtij prioriteti që ka shpalosur kryeministri Kurti, se luftimi i pandemisë, luftimi i korrupsionit dhe sundimi i ligjit janë ato që reflektojnë kërkesa dhe shpresat e qytetarëve. Pyetje: Zoti Kryeministër, krahas prioriteteve që i keni prezantuar zotit Zahir Tanin, si përfaqësues i UNMIK-ut, a shtruat çështjen e përgjegjësisë për vrasjen e Mon Balajt dhe Arben Xheladinit? Nga se keni thënë se e keni gjithmonë prioritet, nëse po, cila ishte gatishmëria dhe përgjigjja e tij? Faleminderit!

E nderuar ministre Nagavci, Studentët e disa institucioneve private të arsimit të lartë nuk janë të regjistruar fare në Librin Amë në Ministrinë e Arsimit dhe, si rrjedhojë, ata nuk mund të marrin një diplomë valide dhe mund të humbin kështu edhe mundësinë e tyre për të studiuar jashtë vendit. Ne në mandatin e kaluar e kemi trajtuar këtë çështje në Komisionin Parlamentar për Arsim dhe aty ka pasur një seri të akuzave dhe kundërakuzave në mes të institucioneve private të arsimit të lartë dhe të Ministrisë së Arsimit, pra përgjegjësia bartet sa tek njëra palë sa tek tjetra, mirëpo e vërteta është që deri më tani nuk kemi pasur as edhe një veprim nga ana e ministrave të kaluar të Arsimit për të zgjidhur këtë çështje dhe unë dua të ju pyes nëse është paraparë ndonjë masë eventuale që të adresoni edhe papërgjegjësinë e institucioneve private të arsimit të lartë, por gjithashtu edhe papërgjegjësinë e secilit ministër, në mënyrë që studentët të mos i vuajnë këto pasoja. 

Zonja dhe zotërinj, Jemi dëshmitarë të një dukurie sa të dhimbshme, aq edhe të rrezikshme, që manifestohet në udhëkryqe afër semaforëve, në të gjitha anët e Kosovës. Disa fëmijë lypës, disa dhe foshnja në duart e nënave, pothuajse gjithë të zhveshur, kurse disa fëmijë të tjerë lypsarë manifestohen në rrugë, duke punuar punë shumë të rënda. Zoti ministër, ju posa erdhët në qeveri dhe mendojmë që është qeverisja e mirë, a keni mundësi që me kreativitetin tuaj intelektual intelektual në bashkëpunim me ministrat tjerë, të trajtoni këtë dukuri në dy drejtime. I pari është që të trajtohen njerëzit me nevoja të veçanta, kurse tjetri është në qoftë se ekziston ndonjë kompani për të cilën flitet që shpërdoron qeniet njerëzore, atëherë të merren masa adekuate, por që njëherë e mirë kjo dukuri që është e vjetër më se tri dekadash në këtë qeverisje të evitohet. Faleminderit! 

Unë po e lexoj pyetjen. Me propozim-amendamentin tim Kuvendi i Kosovës me Buxhetin e vitit 2019 ka ndarë 200 000 euro për shtatoren në Parkun Fadil Vokrri. Më pas Ministria e Kulturës, Rinisë dhe Sportit ka vazhduar me procedurat për përzgjedhje dhe punim të shtatores së legjendës së futbollit Fadil Vokrri dhe prej muajit tetor 2020 shtatorja e Fadil Vokrrit është përfunduar nga skulptori Agron Blakçori. Por, edhe pse shtatorja është e përfunduar ajo ende nuk është vendosur në lokacionin e përcaktuar, tek stacioni Fadil Vokrri. Në vizitën që kam bërë tek stadioni Fadil Vokrri kam parë se përveç punës në bazament të shtatores nuk ka asnjë fillim të punimeve për Parkun Fadil Vokrri në qendër të të cilit do të duhej të vendosej shtatorja. Më datë 9 qershor 2021 bëhen tri vite nga vdekja e legjendës së futbollit Fadil Vokrri, andaj pyes a është duke punuar Ministria e Kulturës, Rinisë dhe Sportit që deri më datë 9 qershor 2021 të përfundojnë punimet në Parkun Fadil Vokrri dhe të bëhet vendosja e shtatores së Fadil Vokrrit, e cila tanimë është e gatshme qe gjashtë muaj.

Duke njohur edhe infrastrukturën e stadiumit, por edhe hapësirën përreth, pra ideja që të ndërtohet edhe parku afër stadiumit ka qenë mu për shkak të parcelës, e cila është pronë e Komunës përballë dhe mundësia që qytetarët edhe të vijnë e të fotografohen tek shtatorja, pra ka qenë një ide e tillë. Arsyeja pse është vendosur që shtatorja lokacioni të vendoset aty unë nuk e di saktë, ndoshta ju si ministër keni ndonjë informacion, por ideja ime fillestare ishte që përveç shtatores së legjendës të jetë edhe parku, ku edhe fëmijët, të cilët e kanë dhe do ta kenë edhe në të ardhmen idol Fadil Vokrrin, të kenë mundësi edhe të qëndrojnë pranë parkut dhe shtatores së tij. 

I nderuar ministër, Prej fillimit të Pandemisë COVID-19 profesionistët shëndetësor kanë qenë në vijën e parë të frontit të luftës me Pandeminë. Gjithashtu, në këtë betejë me Pandeminë punë të jashtëzakonshme kanë bërë edhe stafi mbështetës, Inspektorati dhe Policia e Kosovës. Në mandatin e kaluar me dy raste kam propozuar amendamente për të rritur pagat për këto kategori, pra për profesionistët shëndetësor, stafin mbështetës, Inspektoratin dhe Policinë. Por, kjo nuk u mbështet nga partitë që ishin në pushtet. Dy qeveritë e kaluara, Kurti dhe Hoti, vendosën që profesionistëve shëndetësor t’u jepet pagesa shtesë 300 euro, ndërsa stafi mbështetës më vonë përfitoi nga shtesa në pagë vetëm pas protestave në kohë Pandemie. Ndonëse edhe shumë specializantë e profesionistë shëndetësor, punëtorë të sigurimit e pastrimit, nuk u përfshinë në pagesën shtesë, pas miratimit të Ligjit për parandalimin dhe luftimin e Pandemisë COVID-19 Qeveria Hoti bëri një kategorizim të pagës shtesë për stafin shëndetësor, stafin mbështetës dhe kategoritë tjera. Në mbledhjen e 8-të të Qeverisë së Kosovës, datë 21.04.2021 përveç zvogëlimit të shtesës për pensionistët u zvogëluan edhe pagesat shtesë edhe për profesionistët shëndetësor, ndërsa nuk u përfshinë stafi mbështetës, Inspektorati e as punëtorët e sigurimit e të pastrimit. Përse keni zvogëluar pagesën shtesë për profesionistët shëndetësor? Pas më shumë se një vit pune të palodhshme do të duhej të rritej stimulimi për njerëzit që po përballen drejtpërdrejtë me Pandeminë e jo të zvogëlohet pagesa shtesë për ta. Përse keni bërë një veprim të tillë? Nuk jeni të kënaqur me punën e mjekëve apo çfarë ka ndodhur, që u janë zvogëluar shtesat profesionistëve shëndetësor?

E nderuara ministre Haxhiu, Rastet e dhunës ndaj grave në familje dhe jashtë saj, sidomos në kohë të Pandemisë e të izolimit janë rritur shumë. Në përgjithësi, ndonëse me disa veprime të vogla, ende këto raste nuk trajtohen si duhet, nuk ka seriozitet nga institucionet e drejtësisë. Shtëpia pra nuk është vend i sigurt për të gjithë. Cilat janë veprimet që keni marrë, ose do të merrni, si ministri për t’i trajtuar këto raste dhe për të lehtësuar raportimin? 

Shumë viktima heqin dorë nga drejtësia, për shkak të kushteve të rënda ekonomike. A keni menduar se si t’ua mundësoni atyre qasjen në drejtësi?