Faleminderit, kryetar! I nderuar ministër, nëse jeni në dijeni, rruga regjionale, respektivisht magjistralja Prishtinë - Mitrovicë, e që ndërlidh edhe qytetin e Vushtrrisë, tani e disa vjet ka mbetur ende e papërfunduar. Në segmentin nga fshati Dumnicë e deri në hyrje të qytetit të Vushtrrisë, që janë afërisht 5 deri 6 km, kompanitë e kontraktuara për realizimin e projektit ende nuk kanë ndërmarrë veprimet e 13 duhura. Si pasojë e kësaj, qytetarët e asaj ane çdo ditë përballen me kolona të gjata disaorëshe në rrugë. I nderuar ministër, a mund të na tregoni se në cilën fazë ndodhet projekti? Kur është paraparë finalizimi i këtij segmenti? Dhe, deri kur do të zgjasin punimet? 

 Faleminderit, kryetar! Kolegë deputetë, Është në fakt seanca e dytë që zoti Sveçla nuk është i pranishëm, uroj që të paktën Qeveria t’ia di lokacionin, sido që të jetë, meqenëse është procedurë sipas Rregullores, unë do ta shtroj pyetjen dhe shpresoj që në një të ardhme të kemi përgjigje sipas procedurës së Rregullores. Policia e Republikës së Kosovës është institucioni më kredibil dhe i vlerësuar dhe jorrallëherë na ka bërë krenar me performancën profesionale dhe gatishmërinë vetëmohuese në mbrojtje të institucioneve, rendit publik e Kushtetutës dhe garantimit të të drejtave qytetare. Si e tillë, ajo është ballafaquar edhe me protesta dhe dhunë brutale nga eksponentë të partisë, që sot gjendet në pushtet. Të gjithë jemi dëshmitarë, ekzistojnë edhe video-incizime, se shpërfaqjen e kësaj dhune 14 e udhëhiqte edhe zoti Sveçla, sot ministër i MPB-së. Dhunë, nga e cila pësuan dhjetëra policë, jo pak pësuan dëmtime, madje edhe me invaliditet jetësor. Desha të di nga zoti Sveçla, cila është pesha e fajësisë në ndërgjegjen e tij lidhur me këtë çështje dhe a vlerëson se Ministria e Punë e të Brendshme do të duhej të nxirrte masa bonifikuese ndaj kësaj kategorie, e cila ke qenë e ekspozuar ndaj kësaj dhune? Faleminderit!

Faleminderit, kryetar! Si pasojë e mosvendosjes së semaforëve në udhëkryqin ku ndërlidh fshatin Studime me qytetin e Vushtrrisë, çdo ditë ka aksidente. Fatkeqësisht, në këtë rrugë kemi pasur edhe dy humbje jete deri më tani. Gjithashtu, edhe në udhëkryqin në rrugën regjionale Prishtinë – Mitrovicë, konkretisht udhëkryqi i fshatit Begaj, udhëkryq jashtëzakonisht i ngarkuar me biznese dhe këmbësoë, frekuentohet një numër i madh i automjeteve. I njëjti nuk ka semaforë dhe është i parregulluar. A mund të na tregoni, se pse nuk po vendosen këta semaforë dhe rrjedhimisht kërkoj nga ana juaj, në kuadër të kompetencave tuaja kushtetuese dhe ligjore, që t’i ndërmerrni të gjitha veprimet e nevojshme. 

 Faleminderit! Zonja dhe zotërinj, Flitet shumë shpesh për qentë endacakë, të cilët me shumicë gjinden në rrugët tona dhe është shumë shpesh me frekuencë shumë të lartë përfundojnë fëmijët në spitale. Domethënë, ekziston një agresivitet i tyre. Unë kam pasur fatin të jetoj dhe të jetoj në vende të ndryshme. Në vendet e civilizuara njerëzit i marrin qentë për zinxhirë në njërën dorë e në tjetrën lopatën për t’i hequr mbeturinat e fekaliet që ata i lirojnë, kurse në vendet siç është India dhe vendet si ato, atje jetojnë me majmunë e me qenë të rrugëve e gjithandej vjen erë trishtuese dhe rrezikohen njerëzit. Tani pyetja shekspiriane është: të jetojmë ne si vendet e civilizuara apo vendet e prapambetura? Besoj që, jo kjo kambanë e imja, por vuajtjet e fëmijëve, frustracionet e tyre, përfundimi në spitale e frekuenca e shumë njerëzve të pafat që përjetojnë, qoftë nga llava, qoftë nga individët qenë të caktuar dhe ndyrësitë që shkaktohen, është koha të merren masa. Faleminderit

Vazhdimisht kemi dëgjuar për ankesa dhe parregullsi nga ana e bujqve lidhur me mënyrën se si janë shpërndarë grandet nga ana e Ministrisë së Bujqësisë. I nderuar ministër, kjo është pyetje e shumë qytetarëve të interesuar, se cili do të jetë modaliteti i shpërndarjes së grandeve nën drejtimin e Ministrisë nga ana e juaj? 

Faleminderit, kryetar! Përshëndetje Kabinet Qeveritar, E nderuara ministre Haxhiu, A mund të na informoni më hollësisht rreth çështjes së pronës së Ministrisë së Drejtësisë në Vushtrri, ku më parë ishte Motel Vicianumi. Qytetarët janë të interesuar aty të dinë se si erdhi deri te dhënia në shfrytëzim e kësaj parcele mbi 2 hektarë e 12 ari me një çmim banalisht të ulët dhe po ashtu, kanë të drejtë të dinë se kush ka dhënë leje për rrënimin e objekteve ekzistuese në atë parcelë. Ato objekte do të mund të rivitalizoheshin shumë lehtë, në mënyrë që të shfrytëzoheshin për qëllime publike në të mirë të qytetarëve, duke qenë se edhe zona aty është shumë e përshtatshme. Kontrata, sipas vlerësimeve të Auditorit, doli të jetë e kundërligjshme, por si e tillë i ka shërbyer edhe kryetarit të komunës që të bëjë marrëveshje me përfituesin e kontratës, gjegjësisht të parakontraktojë një pjesëz nga ajo parcelë me disa perona, kinse si stacion autobusësh dhe komuna pastaj të paguante qira të majme aty. Ju si ministri keni marrë veprimet e nevojshme dhe konform përgjegjësive tuaja, për çka u jemi mirënjohës dhe ju tregoj se edhe vushtrriasit u janë mirënjohës për këtë çështje. Nëse mundeni të na jepni më shumë hollësi, ministre do të ishim mirënjohës. Faleminderit! 

Faleminderit, ministre! Desha pyetje shtesë kështu: A e keni njoftuar Komunën e Vushtrrisë për anulimin e kontratës së paligjshme? A jeni paditur si Ministri e Drejtësisë nga operatori ekonomik dhe nëse po, deri ku ka shkuar procesi? Ashtu siç thatë ju, gjatë fushatave zgjedhore lokale është keqpërdorur për marketing politik bartja e pronësisë, por qytetarëve të Vushtrrisë u intereson një çështje, a do të mbetet kjo pronë në shërbim të qytetarëve dhe të publikes? A mund ta garantoni ju këtë? Faleminderit! 

Përshëndetje për kryesuesin e seancës! Zëvendëskryeministër, Kabinet Qeveritar, Deputetë, Shkolla Halil Alidema në Pozharan të Vitisë ka filluar së ndërtuari qysh në vitin 2016, konform memorandumit Ministria e Arsimit, Ministria e Administratës Publike, pra investim nga MASHT, por projekti është implementuar nga Ministria e Administratës Publike. Për njohurinë tuaj, ministre, ky ka qenë projekt trevjeçar, por fatkeqësisht kjo shkollë ende nuk është përfunduar. Me rastin e tërmetit në Republikën e Shqipërisë me datë 26 nëntor 2019 shkolla e vjetër me vendim të ekspertëve është konstatuar se paraqet rrezik, çka si rrjedhojë nxënësit dislokohen për mbajtje të procesit edukativo-arsimor në Shkollën Kongresi i Manastirit dhe punohet në tri ndërrime e që kjo është edhe kundër rregullave higjienike, por edhe jo konform rregullave pedagogjike. Pyetja është, a do të jetë e gatshme kjo shkollë që të lëshohet në funksion për vitin e ri shkollor 2021/2022? Faleminderit!

 Faleminderit Kryetar i Kuvendit! I nderuar ministër, Në vazhdimësi kemi kërkuar që institucionet shëndetësore të furnizohen me barna dhe material tjetër kirurgjik. Në vazhdimësi ka pasur mungesa të furnizimit dhe të them të drejtën institucionet shëndetësore nuk janë furnizuar as 50 për qind me këto barna. Gjatë kohës së pandemisë, një trajtim për qytetarët që kanë qenë të infektuar me COVID-19 ka pasur një kosto të lartë buxhetore, që vërtet ka qenë e papërballueshme e të mos flasim përbrenda një familjeje janë infektuar dy e më shumë persona. Pasojat e mostrajtimit të mjaftueshëm me barna po shihet edhe sot ku po kemi vdekje me pasoja post-COVID. Po këto ditë, qytetarët po përballen me një problematikë tjetër që është mungesa e insulinave. Këtë çështje e ka ngritur edhe deputeti Haxhiu, mirëpo është kërkesë e qytetarëve. Unë njëkohësisht e kam ngritur këtë çështje dhe pyetje. Ministër, pse nuk ka mjaftueshëm insulina nëpër institucionet shëndetësore, duke e ditur se pacientët nuk guxojnë të mbeten pa u trajtuar me insulina në baza ditore? A do t’i kompensoni dhe cilat do të jenë veprimet konkrete afatshkurta, në mënyrë që pacientët të furnizohen me insulina, sepse po të mos trajtohen, ju i dini pasojat cilat do të jenë për pacientë.

 Faleminderit, kryetar! I nderuar ministër Çeku, Pyetja ka të bëjë me qytetin e Ferizajt i cili i ka mbi 100 mijë banorë dhe ka mungesë serioze të infrastrukturës së futbollit. Stadiumi kryesor i qytetit Ismet Shabani është degraduar nga qeverisjet lokale dhe sot ky qytet ka një stadium të stërvjetëruar sintetik që është si pasojë e një donacioni nga Bashkimi Evropian. Është i vetmi stadium ku të gjitha moshat: fatoset, pionierët, kadetët, ekipi i parë, seniorët, të gjithë pra zhvillojnë edhe ushtrimet, po edhe lojërat e tyre. Është i superngarkuar dhe është e pamundur t’i zhvillojë ushtrimet, lojërat, e aq më pak talentet, për shkak pra të ngarkesës por edhe barit të stërvjetëruar sintetik. Shumë qytete kanë edhe nga tri e katër stadiume, përfshi edhe stadiumeve ndihmëse. Ne i gëzohemi këtij fakti, por mendojmë që edhe Ferizajt i duhet një stadium serioz e derisa ky të bëhet, së paku një renovim i stadiumit të vjetër sintetik. 25 Qyteti i Ferizajt është neglizhuar tash e njëzet vjet nga të gjitha qeveritë dhe pyetja është: ju lutem a ka mundësi si Ministri të na tregoni nëse mund të na ndihmoni në renovimin e stadiumit të tanishëm, por edhe nëse Ferizaj është diku në radhë për një stadium të ri, sepse është e pamundur të zhvillojë talente, kur nuk ka as kushte bazë për të zhvilluar këtë sport.