Ministër, Banorët e komunës së Skenderajt, në veçanti të fshatrave Klinë e Poshtme, Klinë e Epërme, Klinë e Mesme po përballen prej kohësh me mungesë të investimeve dhe vonesa të pajustifikueshme në projektet rrugore. Në këtë kontekst, kërkoj nga ju ministër një përgjigje të qartë. Pse projekti për rrethin në Klinën e Poshtme dhe përmirësimi i rrugës Skenderaj-Klinë e Epërme ende nuk është realizuar, kur qytetarët vazhdojnë të përballen çdo ditë me rrezik, me neglizhencë institucionale dhe me një numër të madh të aksidenteve në këtë rrugë? 

Në cilësinë e kryetares së Komisionit për Administratë Media, kam pranuar ankesa të shumta nga profesionistët e teknologjisë informative të komunave të Kosovës. Prandaj, duke pasur parasysh faktin që këta profesionistë të teknologjisë informative në komunat e Republikës së Kosovës janë përjashtuar nga kategorizimi i ekspertëve sipas shtojcës 14.4 të Ligjit nr. 8/L-196 për pagat në sektorin publik dhe Rregullores numër 22/2024, ndonëse kryejnë funksione me përgjegjësi të lartë me të njëjtit pra, me kolegët e tyre në nivel qendror në ASHI konkretisht, a mund të na sqaroni pse është bërë ky përjashtim dhe çfarë masash konkrete do të merrni për të garantuar zbatimin e parimit për punë të njëjtë pagë të njëjtë, dhe trajtim të barabartë për këta profesionistë?