Pyetja ime parlamentare i drejtohet Ministrit të Infrastrukturës dhe lidhet me urën e dëmtuar në komunën e Leposaviqit. Konkretisht, në fillim të këtij viti, gjatë rritjes së madhe të nivelit të ujit të lumit Ibër, ka ardhur deri te dëmtimi i urës që lidh fshatrat Bellucë, Drenovë, Borovë, Potkom dhe vendbanime të tjera të vogla me fshatin Leshak. Gjithashtu, kjo urë e dëmtuar, ministër, i lidh të gjitha këto fshatra dhe vendbanime me rrugën magjistrale Jarinjë – Mitrovicë, si dhe me komunitetin lokal dhe institucionet lokale.

Për shkak të dëmtimeve serioze, ura do të mbetet e mbyllur për qarkullim, si për automjete të udhëtarëve ashtu edhe për transport mallrash, derisa të bëhet një analizë e plotë për natyrën e dëmtimeve dhe nëse ura është e përdorshme apo jo.

Ju, nga Ministria, keni angazhuar një kompani private që ishte e ngarkuar të bëjë analizën e dëmtimeve, megjithatë për një kohë të gjatë nuk ka pasur përgjigje nga Ministria lidhur me natyrën e dëmtimeve. Në këtë drejtim, janë arsyetuar se kanë qenë të shpallura zgjedhjet parlamentare, se mungonte udhëheqja në Ministri dhe se nuk mund të merrnin vendime.

Më pas, pas një kohe, Ministria, pa bashkëpunim me vetëqeverisjen lokale të Leposaviqit – Departamentin për Infrastrukturë, dhe me asistencën e policisë, ka vendosur një lloj sinjalizimi në atë urë, pa dhënë asnjë shpjegim për askënd, as për Komunën e as për qytetarët.

Pyetja ime për ju është: A e ka bërë Ministria analizën për llojin e dëmtimeve në këtë urë? A është kjo urë e përdorshme apo jo? Dhe a keni komunikim me Komunën e Leposaviqit, në mënyrë që eventualisht kjo urë të rikonstruktohet ose të ndërtohet një e re, për të zgjidhur përfundimisht problemin me të cilin përballen këta qytetarë?

Pyetja e dytë gjithashtu i drejtohet Ministrit të Infrastrukturës, Dimal Basha, dhe lidhet me një problem shumë serioz me të cilin përballen të gjithë qytetarët që përdorin rrugën magjistrale Prishtinë – Mitrovicë, në gjatësi prej 52 kilometrash. Ministër, kjo rrugë është në gjendje kaotike, ashtu si edhe rruga në komunën e Leposaviqit: Dren – Belo Bërdo, e cila është rrugë rajonale. Për të dyja këto rrugë është përgjegjëse Ministria që ju drejtoni për mirëmbajtjen e tyre, ndërkohë që në realitet këto dy akse rrugore janë të rrezikshme për të gjithë drejtuesit e mjeteve që i përdorin.

Pra, unë kam folur edhe në një nga seancat e mëparshme, ku kam paraqitur shumë detaje dhe besoj se e kam dorëzuar edhe si pyetje me shkrim. Kam dërguar edhe mbi 40 fotografi ku shihet se ka qindra gropa, dëmtime të shumta, rrëshqitje dheu që nuk pastrohen e nuk mirëmbahen, gjithashtu rruga nuk është e shënuar si duhet, mungon sinjalizimi i rregullt rrugor dhe ka shumë deformime të sipërfaqes.

Kompania që keni angazhuar gjatë tre viteve të fundit shfaqet ndoshta një herë në vit me një kamion të vogël dhe një mjet pune të vogël, pa asnjë shenjë identifikuese se për cilën kompani bëhet fjalë dhe pa vendosur sinjalizim paralajmërues për drejtuesit e mjeteve gjatë punimeve.

Prandaj, ne të gjithë në veri duam të dimë: cila është kjo kompani që keni angazhuar për mirëmbajtjen e këtyre dy rrugëve, sa është vlera e kontratës, për sa vite është lidhur kjo kontratë dhe cilat janë detyrimet e saj? Nëse detyrimi i tyre është të marrin një kontratë prej 5 milionë eurosh dhe të mos bëjnë asgjë, atëherë na e thoni hapur për dijeni të qytetarëve. Nëse detyrimi i tyre është të punojnë çdo ditë në terren dhe të mirëmbajnë këto rrugë, atëherë mendoj se duhet ta bëjnë këtë dhe të krijojnë kushte minimale që të mund të qarkullojmë me të gjitha mjetet.