Në komunën e Gjilanit ka kohë që është duke u ndërtuar Shkolla e Mesme e Muzikës. Edhe pse me shumë vonesë, kjo shkollë ende nuk është funksionalizuar. E njëjta duke u ndërtuar ka filluar edhe të dëmtohet. Gjithashtu, nga të reshurat e shiut brenda objektit pikon uji, për të cilën gjë kemi ngritur këtë shqetësim edhe në Komunën e Gjilanit. E nderuara ministre Nagavci, pyetja ime konkrete është: A do të jetë i gatshëm objekti i Shkollës së Mesme të Muzikës për muajin shtator, ashtu që nxënësit të kenë mundësi ta fillojnë vitin e ri shkollor në objektin e ri? Faleminderit! 

Me vite të tëra qeveritë e kaluara u kanë premtuar qytetarëve gjilanas ndërtimin e një stadiumi modern dhe sipas standardeve të UEFA-s, në qytetin e Gjilanit. Një fushë e tillë moderne për të gjithë futbolldashësit është e domosdoshme në qytetin e Gjilanit, edhe nga fakti i pjesëmarrjes aktive në gara ndërkombëtare të dy ekipeve nga ky qytet, ajo e ekipit të Dritës dhe ekipit të Gjilanit. Megjithatë, prolongimi i vazhdueshëm i punimeve dhe ngadalësia në finalizimin e saj paraqet një shqetësim serioz te qytetarët e Gjilanit. Andaj, i nderuar ministër, kur parashihet të përfundojnë punimet në ndërtimin e stadiumit të ri të Gjilanit dhe sa po respektohen standardet e UEFA-s në ndërtimin e saj?

Por para një viti kryetari i komunës, Lutfi Haziri, ka deklaruar se projekti i stadiumit do të kalojë nën menaxhimin e Ministrisë së Kulturës, Rinisë dhe Sportit, duke i justifikuar kështu ndërprerjet e punimeve. Pra, i nderuar ministër, A është ky projekt tani nën menaxhimin e ministrisë tuaj?

Në raportin vjetor të punës për vitin 2020 të Këshillit të Kosovës për Trashëgimi Kulturore theksohet mungesa e vlerësimit të projekteve të trashëgimisë kulturore dhe domosdoshmëria që këto vlerësime të bëhen vetëm nga ky institucion. Në Ligjin për trashëgimi kulturore, në nenin 5, pika 2. Obligon Këshillin e Kosovës për Trashëgimi Kulturore të bëjë vlerësimin e projekteve të propozuara dhe të parashtruara nga institucionet e fushave përkatëse. Përderisa ministria është përgjegjëse për aprovimin dhe implementimin e këtyre projekteve në baza proporcionale nga buxheti i saj. Andaj, i nderuar ministër, A kemi praktika që vlerësimet e projekteve të propozuara për objekte të trashëgimisë kulturore e kanë bërë komisione të tjera funksionale brenda ministrisë dhe jo Këshilli i Kosovës për Trashëgimi Kulturore.

Faleminderit, i nderuari kryetar i Kuvendit! I nderuari kryeministër Kurti, Kabinet qeveritar, Të nderuar deputetë, Të dashur qytetarë, 26 Në kuadër të pakos së ringjalljes ekonomike, Ministria e Kulturës, Rinisë dhe Sportit ka bërë thirrje publike për ofrimin e mbështetjes financiare publike për OJQ të fushës së sportit, për financimin e projekteve, programeve të OJQ-ve në Departamentin e Kulturës dhe Trashëgimisë Kulturore për financimin e projekteve të individëve në departamentin e kulturës, për financimin e projekteve në zbatimin e objektivave, rritja e përfshirjes së të rinjve në tregun e punës nëpërmjet edukimit joformal, për mbështetje financiare individëve në fushën e sportit, për mbështetje financiare për sportistë, balerinë dhe valltarë, për shërimin dhe rikuperimin e lëndimeve etj. I nderuari ministër, A mund të na informoni se si ka shkuar ky proces? Si është bërë vlerësimi dhe përzgjedhja e përfituesve dhe cilët do të jenë mekanizmat e monitorimit të përfituesve të mbështetjes financiare?

Faleminderit, kryetar! Kabinet qeveritar, Të nderuar deputetë, Të dashur qytetarë, Qeveria e Kosovës për herë të parë ka ndarë grant për mësimdhënësit me problem shëndetësor. Granti me vlerë prej 1 700 000 euro është mirëpritur nga mësimdhënësit që kanë vështirësi për zhvillimin e mësimdhënies së rregullt, për shkak të problemeve shëndetësore. 

Përkushtimi i Ministrisë së Arsimit në këtë rast nuk ka munguar, duke bërë zgjidhjen e një problemi të vjetër, i cili me të drejtë është ngritur shpeshherë. E nderuar ministre, pasi që grantet e tilla nuk janë shpërndarë asnjëherë më parë, nuk ka ndonjë infrastrukturë ligjore që do të mundësojë që secili mësimdhënës të kryejë punën e vet, pa pasur brengën e ndërprerjes së punës shkaku i shëndetit. Si do të veproni në këtë rast, sa i përket infrastrukturës ligjore dhe kur planifikohet të fillojë shfrytëzimi i këtij granti të ndarë për vitin 2022?

Faleminderit, kryetar! I nderuar Kabinet qeveritar, Të nderuar deputetë, Të dashur qytetarë, Në programin qeverisës është paraqitur si projekt me prioritet mësimi dual dhe zbatimi i tij në kushtet e Kosovës. Marrë parasysh referencat e shpeshta në boshllëkun e evidentuar të shkathtësive të të rinjve tanë në profesione të shumta, gjithnjë e më shumë ka mangësi dhe kërkesë nga sipërmarrësit prodhues të Kosovës, krijimi i programeve të mësimit dual është gjithnjë e më shumë emergjencë e përgjithshme, veçanërisht referuar sektorëve prodhues të industrisë së lehtë dhe asaj ushqimore. E nderuar ministre, kur do të kemi rezultatin e parë konkret me programin dual të mësimit në Kosovë dhe çfarë është duke ndodhur aktualisht me përgatitjet e ministrisë në këtë drejtim?

Faleminderit, kryetar! I nderuar kryeministër, Kabinet qeveritar, Të nderuar deputetë, Të dashur qytetarë, Mbrojtja dhe kultivimi i trashëgimisë kulturore në Kosovë, është fusha më delikate dhe më e cenuar ndër vite. Ka shumë pritje në lidhje me daljen në pah të kësaj pasurie, e cila, po ashtu do të ishte paraprijëse e një programi të vërtetë turistik të Kosovës. I nderuar ministër, Sa monumente, objekte apo komplekse të fondit tonë të Trashëgimisë Kulturore janë duke u punuar aktualisht nga projektet me bashkëpunimet e Ministrisë së Kulturës, Rinisë dhe Sportit, dhe cilat janë planifikimet që keni për vitin 2023? Faleminderit!

Kabinet qeveritar, Të nderuar deputetë, Të dashur qytetarë, Studentët shpenzojnë të ardhurat e tyre për t’u arsimuar, por pavarësisht shpenzimeve, mundin e bërë, si dhe kohën e kaluar, në fund të studimeve disa nga ta u pajisen me diploma të pavlefshme. Këto ndodhën pasi që kolegje e universitete regjistruan studentë në programe të pa akredituara, e disa edhe për shkak të tejkalimit të numrit të studentëve përtej vendimi të Këshillit Shtetëror të Cilësisë. E nderuara ministre, A kemi kolegje e universitete të cilat kanë regjistruar studentë në programe të caktuara, e të cilat nuk janë të akredituara? Ose, konkretisht, a është i akredituar dhe i licencuar Kolegji Universum, në programin infermieri në të PEARSON. Faleminderit! 

A mund të na informoni shkurtimisht për shërbimet që po ofrohen për bizneset e Kosovës në këtë Portin e Durrësit? Sa është ulja e kostove për bizneset dhe cilat janë benefitet për biznese dhe ekonominë e vendit, që nga fillimi i zhdoganimit të plotë dhe dalja në det?

Pasi që Komuna e Gjilanit ka kryer të gjithë procesin e shpronësimit të pronave për projektin e impiantit të ujërave të zeza dhe ka deponuar mjetet buxhetore që i takojnë komunës, na njoftoni se ku është procesi për fillimin e ndërtimit të këtij impianti në komunën e Gjilani?

Pasi që në detyrën tuaj përveç infrastrukturës ligjore, tani i keni edhe shërbimet sociale, a mund të na njoftoni se çka keni ndërmarrë për të miturit, të cilët bien ndesh me ligjin, duke pasur parasysh fazën e parandalimit deri tek integrimi i tyre në shoqëri pas kryerjes së ndonjë vepre penale nga të miturit?

A mund të na njoftoni se cilat kanë qenë arsyet e ngadalësimit dhe ndërprerjes së punimeve në rrugën Gjilan - Kllokot dhe kur pritet që të rifillojnë punimet?

Duke qenë të vetëdijshëm për rëndësinë e projektit të çerdhes publike në Istog, por edhe përkushtimin e MASHT-it rreth reformës rrënjësore në transformimin e infrastrukturës mësimore gjithandej vendit, cilat janë hapat që keni menduar t’i ndërmerrni si ministri, që ky projekt të rinisë dhe të përfundojë në periudhën kohore sa më optimale.