Faleminderit kryetar! Kryeministër, Kabinet qeveritar, Të nderuar kolegë deputetë, Republika e Kosovës është vend i vetëm në rajon i cili e ka një sistem të menaxhimit të performansës, duke rritur në këtë mënyrë llogaridhënien, transparencën dhe punën e komunave 29 dhe nxitjen për ofrimin e shërbimeve më cilësore për qytetarë. Së fundi, Ministria e Administrimit të Pushtetit Lokal ka financuar komunat e Republikës së Kosovës në projekte të cilat kanë për qëllim përmirësimin e jetës së qytetarëve përmes programit të grantit të performansës, programit komunal për zhvillim socio-ekonomik dhe përmes projektit ‘Komunat për të rinjtë në Kosovë’. I nderuar ministër, Cila ka qenë performansa e komunave deri më tani dhe çfarë kriteresh janë aplikuar në ndarjen e këtyre granteve për të cilat i ceka më lart? 

Faleminderit, nënkryetare! Të nderuar kolegë, Të nderuar ministra, Pyetja ka të bëjë me ministren e Ekonomisë, zonjën Artane Rizvanolli. E nderuar ministre, javën e kaluar ju dhe kryeministri Kurti njoftuat nënshkrimin e marrëveshjes Kompakt me Agjencinë Qeveritare të Shteteve të Bashkuara të Amerikës ‘Milenium Challenge Corporation’, po ashtu dhe procesi i negocimit për këtë marrëveshje. Kjo marrëveshje është orientuar në sektorin e energjisë, marrë parasysh diskutime të shumta publike lidhur me këtë çështje dhe po ashtu me shumën mjaft të madhe prej 236 milionë dollarëve pritet nga ju të sqaroni hollësitë e këtij projekti për deputetët dhe qytetarët e vendit. Çfarë do të përmbajë konkretisht kjo marrëveshje 236 milionë dollarësh në fushën e energjetikës dhe çfarë do të ndryshojë konkretisht në Kosovës pasi kjo marrëveshje të jetë zbatuar plotësisht? 

Çështja ka të bëjë me ndërtimin e rrugës magjistrale në Ferizaj që kap prej fshatit Prelez dhe Fshatit të Vjetër që është një nyjë kryesore që lidh qytetin e Ferizajt me komunat përreth dhe ka disa vjet që flitet për projektin e kësaj rruge, e cila është njëra ndër rrugët kryesore në magjistrale që kalon në Ferizaj, por që nuk është duke përfunduar asnjëherë. 

I nderuar zoti ministër Aliu, A mund të na tregoni se në cilën fazë është ky projekt dhe se kur pritet të rifillojnë punimet në këtë segment rrugor? Faleminderit! 

A keni mundësi të na tregoni se kur parashihet të fillojë projektimi dhe ndërtimi i stadiumit të futbollit në Ferizaj dhe të na tregoni se takimet që keni pasur me nivelin lokal se si jeni marrë vesh si kanë shkuar ato takime? Faleminderit!