E nderuar kryesuese, I nderuar Kabinet qeveritar, Të nderuar deputetë, Shumë të dashur qytetarë, Pasi që ministrja e ka marrë guximin sot që të vijë në Kuvendin e Kosovës, pra ta përmbushë obligim e saj moral dhe ligjor, unë e kam parë të arsyeshme që në mesin e skandaleve të saj të zgjedh skandalet, të cilat i ka bërë si ministre e Punëve të Jashtme në mbledhjen e Këshillit të Sigurimit të OKB-së, pra para syve të botës, duke pasur parasysh që mbledhjet e tilla janë arena të përballjes në mes të Kosovës dhe Serbisë. Zonja ministre, ju e filloni fjalimin tuaj duke thënë se për herë të parë në vendet e Ballkanit deri më tani shumica e popullit votoi për t’u çliruar nga korrupsioni dhe krimi. Më lejoni t’ju kujtoj që ju jeni vetëm përfaqësuese e Republikës së Kosovës dhe nuk jeni zëdhënëse e vendeve të Ballkanit. Pra, nuk e ke këtë kompetencë. Zonja ministre, në diplomaci duhet të jesh shumë e vetëdijshme se në çfarë instancash flet dhe cili është qëllimi i takimit tuaj, e qëllimi i takimit në Kombet e Bashkuara është forcimi i shtetësisë së Kosovës në arenën ndërkombëtare dhe bartja e mesazheve të qarta që Kosova është një shtet, i cili meriton të njihet ndërkombëtarisht dhe duhet të arrish që të përballesh me Serbinë dhe Rusinë, ku dihet që Serbia ka një pozitë mjaft të favorshme tanimë në rajon dhe jo ta përkrahësh në vazhdimësi narrativën që ka krijuar Serbia sa i përket pozitës së Kosovës që Kosova është një shtet kriminal dhe i korruptuar, që Kosova eksporton jostabilitet politik dhe terrorizëm. 9 Pra, nuk përmendën gjëra të tilla të pavërteta në një pozicion aq të lartë kur je përball Serbisë dhe Rusisë dhe kur ke interesa nacionale përpara, politika e brendshme duhet të shkëputet nga politika e jashtme. Zonja ministre, Fatkeqësisht sot e kemi Gjykatën Speciale, e cila po akuzon Kosovën për krime lufte, përderisa Serbia e ka mbyllur këtë kapitull me Gjykatën e Hagës dhe me një gjykatë, të cilën e ka krijuar përbrenda shtetit të Serbisë dhe e cila funksionon sa për sy e faqe. Homologu juaj serb para syve të botës u drejtua me një varg akuzash të pavërteta sa i përket UÇK-së, e quajti organizatë terroriste dhe disa akuza të pavërteta sa i përket Gjykatës Speciale dhe ju e zgjodhët heshtjen e turpshme. Zonja Gërvalla, Ju kujtoj që aty ku gjykohet historia e shtetësia e Kosovës, lufta e lavdishme dhe e pastër e UÇKsë, fal së cilës ti sot e ke mundësinë të na përfaqësosh dhe të ndihesh goxha krenare. Homologu juaj serb vazhdoi duke bërë shpifje që po sulmohen mjekët serbë, po sulmohen serbët, po sulmohen objektet fetare dhe ta përmendi edhe Manastirin e Deçanit, mirëpo ti zgjodhe që të mos thuash asnjë fjalë, edhe pse ke raporte dhe deklarata të KFOR-it që është përgjegjës për këtë siguri që në 10 vjetët e fundit nuk ka pasur asnjë incident. Tutje, homologu juaj serb foli edhe për krijimin e Ministrisë së Mbrojtjes dhe FSK-së, që kishim material të krenohesh, ashtu si aleatët tonë, por ti heshte. Ambasadori amerikan Mills, ashtu si ambasadorët e mëparshëm të SHBA-së, tha se UNMIK-u ka përmbushur detyrën e tij dhe se duhet të largohet nga Kosova, mirëpo ti nuk e the as edhe një fjalë. Për më tepër, kryeministri u takua me UNMIK-un dhe ia shtoi legjitimitetin Rezolutës 1244. Zonja ministre, krejt në fund skandalin diplomatik që e ke bërë me një shtet mik, siç është Gjermania, duke iu drejtuar “Gjermania naciste” dhe kthehesh 80 vjet pas në histori, e akuzon se kishte bërë krime ndaj serbëve dhe popujve të tjerë, përfshirë shqiptarë. 10 Sinqerisht Gjermania nuk të ka marrë me seriozitet, se po ta merrte me seriozitet këtë deklaratë tuajën, para syve të botës, në një mbledhje të tillë, ata ishte dashur ta shqyrtojnë qëndrimin e tyre dhe përkrahjen për shtetin tonë. Zonja ministre, Ju këshilloj si deputete e këtij Kuvendi, pra e zgjedhur e popullit, që ju në forumet e tilla ndërkombëtare...

Faleminderit, i nderuar kryetar! I nderuar Kabinet qeveritar, Të nderuar deputetë, Shumë të dashur qytetarë, Që zonja ministre nuk e ka idenë se çka është shërbimi i jashtëm dhe çka do të thotë përfaqësim i Republikës, këtë po e shohim çdo ditë me deklaratat e saj skandaloze e veprime të papjekura dhe të pamatura, të cilat po e shkatërrojnë Kosovën në arenën ndërkombëtare. Me tërheqjen e ambasadorëve politikë nga misioni ka menduar të marrë praktikë nga disa shtete që këtë veprim e ka të rregulluar me ligj. Për të tërheqësh 13 ambasadorë të rëndësishëm në një kohë është barrë e rëndë për diplomacinë e brishtë kosovare, e këtë e bën sidomos duke e ditur që brenda diplomatëve të karrierës nuk ka staf me gradë ambasadori që t’i zëvendësojë. Asnjëri nga këta ambasadorë nuk ka punuar për ndarjen e Kosovës, e as kundër vendit, por i kanë shërbyer këtij vendi me shumë dinjitet. Ky veprim rrezikon funksionimin e shërbimit të jashtëm, duke lënë ambasadat pa shefa të misioneve dhe me shumë pak staf, kjo do të thotë hakmarrje politike në shpinë të Kosovës. Ky veprim është dashur të bëhet në faza graduale dhe me kritere, e jo me inate personale dhe politike. Faleminderit!

E nderuar kryesuese! I nderuar Kabinet qeveritar, Të nderuar kolegë deputetë, I nderuar kryeministër, 14 Unë i kam dy çështje, të cilat kisha dashur të dëgjoj nga ju, përveç çështjes së reciprocitetit, më intereson të di më shumë për dialogun me serbët lokalë. Çka do të thotë kjo për ju? Pra, çfarë strategjie keni? Cili është qëllimi juaj që doni të arrini me këtë dialog me serbët lokalë? Faleminderit!

: I nderuar kryetar! I nderuar Kabinet qeveritar, Të nderuar kolegë deputetë dhe shumë të dashur qytetarë, Shkas pse mora fjalën sot në këtë Kuvend janë dy çështje shumë të rëndësishme të vendit tonë në arenën ndërkombëtare. E para ka të bëjë me deklarimin e znj. Kusari-Lila pas mbledhjes së fundit të Kryesisë, e ku citoj se: PDK nuk e pranon realitetin e ri dhe se ju po kërcënoheni nga mosprezenca jonë në delegacionet e përbashkëta Kosovë-BE për MSA-në. Znj. Kusari ju kujtoj se në përbërje të delegacioneve të Kuvendit, në përfaqësim ndërkombëtar, Lista Serbe duhet të llogaritet si pozitë sepse e tillë është. Ju jeni në bashkëqeverisje me Listën Serbe dhe nuk mund t’i konsideroni ata si partnerë të opozitës dhe ky është realiteti që ju duhet ta kuptoni dhe jo ne. Kërcënim për vendin tonë është qasja juaj ndaj miqve dhe institucioneve ndërkombëtare. E për rastin konkret, ju kujtoj që ky është ndër delegacionet më të rëndësishme të Kuvendit të Kosovës, sepse në bazë të nenit 132 të MSA-së, ky është komision parlamentar i përbashkët BEKosovë për Stabilizim-Asocim e ky forum përbëhet nga deputetë të Kuvendit të Kosovës dhe deputetë të Parlamentit Evropian. Ju kujtoj edhe një fakt shumë të rëndësishëm. Që nga dita e parë e Qeverisë Kurti 1 e tani Kurti 2, nuk është mbajtur as edhe një mbledhje e vetme e këtij komisioni, e që në bazë të obligimeve ligjore që kemi marrë ne si shtet dhe si Parlament, është dashur të mbahen katër mbledhje të këtij komisioni. E për mosmbajtje të këtyre mbledhjeve, fajtor jeni ju dhe jo opozita. Çështja e dytë, jo më pak e rëndësishme, ka të bëjë me Marrëveshjen e Uashingtonit dhe qëndrimin e ministres Gërvalla karshi kësaj marrëveshjeje, të cilës unë më 19 prill iu drejtova me pyetje parlamentare, mirëpo ministrja vendosi që të më përgjigjet me shkrim. Pra unë sot ndaj me ju qëndrimin e znj. Gërvalla karshi marrëveshjes, e cila këtë marrëveshje citoj e konsideron si: të pamenduar mirë, të panevojshme, e cila nuk respekton interesat e Kosovës, nuk respekton sovranitetin e shtetit tonë se kjo marrëveshje përmban zotime që shkaktojnë pasoja afatgjate për Kosovën, se për të nxjerrë konkluzione për këto zotime duhet dialog me miqtë tanë dhe se kjo nuk është marrëveshje e mirëfilltë ndërkombëtare dhe si e tillë palët nuk i obligon ligjërisht. Znj. Gërvalla vazhdon më tutje duke thënë se: vendosja e Ambasadës në Jerusalem ka shkaktuar fërkime me partnerët tanë evropianë dhe më gjerë dhe arsyetohet se për shkak të evitimit të 12 iritimeve diplomatike, Qeveria Kurti ka vendosur që këtë vendim ta pranojë të qenë, dhe të mos kërkojë rivendim të Ambasadës, por zotohet se Kosova mbetet e interesuar të vendosë marrëdhënie të mira me Palestinën. Më tej, ministrja shkruan se: pikat e Marrëveshjes së Uashingtonit të cilat kanë të bëjnë me ekonominë, kanë diskriminuar Kosovën, sovranitetin dhe interesin e saj dhe se rreth këtyre pikave jemi në dialog me aleatët dhe miqtë tanë. Pra kjo nuk... Pra, a do të thotë kjo që SHBA-të nuk konsiderohen miqtë tanë, pasi që këto zotime janë në mes të SHBA-ve dhe Kosovës? Mirë është që ju si Qeveri njëherë e mirë të deklaroheni lidhur me këto qëndrime, sepse duhet t’i dimë ne, duhet t’i dinë qytetarët tanë dhe SHBA-të si aleat kryesor dhe si palë kontraktuese e kësaj marrëveshjeje duhet të dinë se ku jemi dhe për çka po qëndrojmë si Kosovë. Faleminderit!